चियापानमा पनि नेताहरूको वाक्युद्ध

काठमाडौं, १४ कात्तिक । विपक्षी दलका शीर्ष नेताहरूले डा. बाबुराम भट्टराईले राजीनामा नदिएमा तिहारपछि कडा आन्दोलनमा उत्रने बताएका छन् । आन्दोलनबाटै भट्टराई सरकारलाई हटाउने चेतावनी दिँदै उनीहरूले संसद् पुन:स्थापनाभन्दा पनि नयाँ निर्वाचनमा जानुपर्ने अडान लिए ।
यता, सत्तारूढ दल एमाओवादी अध्यक्ष पुष्पकमल दाहालले भने तिहारसम्ममा सहमति भइसक्ने दाबी गर्दै आºनो पार्टीसमेत नयाँ निर्वाचनको विपक्षमा नरहेको बताए ।
नेपाली कांग्रेसले पार्टी कार्यालय सानेपामा दसैँ, तिहार, इद, छठलगायत पर्वको अवसरमा सोमबार आयोजना गरेको शुभकामना आदान–प्रदान कार्यक्रम तथा चियापानमा उनीहरूले यस्तो बताएका हुन् । माओवादी अध्यक्ष दाहालले आफूहरू नयाँ निर्वाचनसित नडराएको उल्लेख गर्दै आगामी तिहारमा माओवादीले आयोजना गर्ने चियापानसम्ममा सहमति भइसक्ने दाबी गरे । उनले भने, ‘पुन:स्थापना र नयाँ चुनाव दुवैको सम्भावना अझै छ तर अधिकांश दल नयाँ निर्वाचनको पक्षमा भएकाले माओवादी पनि पछि हट्दैन, माओवादी चुनावबाट डराएको छैन ।’ राजनीतिक दलहरूबीच छलफल चलिरहेको बताउँदै उनले छिट्टै निकास आउने दाबी गरे ।
विपक्षी कांग्रेस, एमाले, नेकपा–माओवादीलगायत दलका नेताहरूले भने तिहारअघिसम्म सहमतिका लागि पर्खने र माओवादी लचिलो भएर नआएमा तिहारपछि सरकार ढाल्नेगरी आन्दोलनमा उत्रने चेतावनी दोहोर्‍याए । कांग्रेस सभापति सुशील कोइरालाले माओवादी लचकतामा सहमति भर पर्ने बताउँदै तिहारपछि आन्दोलनलाई तीव्र पार्ने उद्घोष गरे । आन्दोलन र वार्तालाई सँगसँगै अगाडि बढाउने बताउँदै उनले भने, ‘माओवादीले कहिले के र कहिले के भन्ने प्रवृत्तिले अप्ठेरो परेको छ ।’
कांग्रेस नयाँ निर्वाचनको पक्षमा रहेको र बुधबार बस्ने कांग्रेस केन्द्रीय सदस्यको बैठकले निर्णय गर्ने उनको भनाइ थियो । कोइरालाले राष्ट्रपति संविधानको संरक्षक भएको नाताले राजनीतिक निकासका लागि अघि बढ्न आफूले सुझाव दिएको जानकारी गराए ।
एमाले अध्यक्ष झलनाथ खनालले पनि सहमति नभए आन्दोलनमार्फत वर्तमान सरकार हटाउने चेतावनी दिए । तत्काल वर्तमान सरकार हटाएर राष्ट्रिय सरकार निर्माण गर्नुको विकल्प नरहेको भन्दै उनले सहमति नभएमा कडा आन्दोलन गर्ने चेतावनी दिए ।
‘चियापानले लोकतन्त्रका पक्षमा रहेका दलहरूबीच एकताबद्ध भएर जाने सन्देश दिएको छ, अब सहमति नभए तिहारपछि आन्दोलन उठ्छ,’ उनले भने । एमाले उपाध्यक्ष वामदेव गौतमले सहमतिका लागि प्रधानमन्त्रीले राजीनामा दिएर बाटो नखोले आन्दोलनबाट हटाइछाड्ने बताए ।
नेकपा–माओवादीका अध्यक्ष मोहन वैद्यले संवैधानिक संकट अन्तिम अवस्थामा पुगेकाले सबै राजनीतिक दलबीच सहमति गर्नुको विकल्प नभएकामा जोड दिए । सहमतिका लागि वर्तमान सरकार हटाएर अर्को नयाँ राष्ट्रिय सहमतीय सरकार गठन गर्नुपर्ने उनको भनाइ थियो । सहमति नभएमा कांग्रेस, एमालेले गर्ने आन्दोलनमा आºनो समर्थन रहने बताउँदै उनले भने, ‘कांग्रेस, एमालेले सरकारविरुद्ध गर्ने आन्दोलनको पहिलादेखि समर्थन गरेकाले अब पनि दृढ समर्थन रहनेछ ।’
पूर्वसंविधानसभाका अध्यक्ष सुवास नेम्वाङले पूर्वप्रधानन्यायाधीशहरूले दिएको सुझावअनुसार पनि बाधा–अड्काउ फुकाउन सकिने बताए । ‘नयाँ विचार आएको छ, संसद् पुन:स्थापना गरेर त्यसमार्फत नयाँ चुनावमा जान सकिन्छ,’ उनले भने ।
कांग्रेस नेताकै दुईथरी कुरा
चियापानमा कांग्रेस सभापति कोइराला संसद् पुन:स्थापनाको विपक्षमा देखिए पनि वरिष्ठ नेता शेरबहादुर देउवा र उपसभापति रामचन्द्र पौडेलले भने पक्षमा बोलेका थिए । नेता देउवाले चुनावका लागि समेत संसद् पुन:स्थापना हुनुपर्नेमा जोड दिए । ‘चुनाव गराउनका लागि पनि संसद् पुन:स्थापना गर्नुको विकल्प छैन,’ उनले भने । नेता पौडेलले पनि चुनावमा जान देखिएका बाधा, अड्चन हटाउनका लागि समेत पुन:स्थापना गर्नुपर्नेमा जोड दिए ।
कांग्रेस केन्द्रीय समिति बैठक बुधबार
मुलुकको पछिल्लो राजनीतिक अवस्थाबारे छलफल गर्न नेपाली कांग्रेसले बुधबार केन्द्रीय कार्यसमिति बैठक बोलाएको छ । पार्टी कार्यालय सानेपामा बस्ने बैठकमा संविधानसभा पुन:स्थापना वा नयाँ निर्वाचनमा जाने भन्ने विषयमा आधिकारिक धारणा तय गरिने सभापति सुशील कोइरालाले जानकारी दिए । उनले भने, ‘बुधबार बस्ने केन्द्रीय समिति बैठकबाट नयाँ निर्वाचनमा जान पार्टीको आधिकारिक धारणा बनाउँछौँ ।’
यस्तो रह्यो कांग्रेसको चियापान
- कांग्रेसको शुभकामना आदान–प्रदान तथा चियापान कार्यक्रममा पार्टीकै वरिष्ठ नेता शेरबहादुर देउवा झन्डै दुई घन्टा ढिला आए । एक बजे कार्यक्रम सुरु भए पनि देउवा पौने दुई बजे मात्र आइपुगेका थिए ।
- चियापनामा आएका पाहुनालाई सभापति सुशील कोइराला, उपसभापति रामचन्द्र पौडेल, नेता शेरबहादुर देउवालगायतले स्वागत गरेका थिए । कांग्रेसको सार्वजनिक कार्यक्रममा कमै देखिने नेता योगप्रसाद उपाध्याय तथा पूर्व सभामुख तारानाथ रानाभाट पनि स्वागत गर्ने लाममा थिए ।
- चियापानमा पुगेका माओवादी अध्यक्ष दाहाल र कोइरालाबीच केहीबेर कानेखुसी भएको थियो । कोइरालाले दाहाललाई पुराना एजेन्डा छाडेर नयाँ एजेन्डा ल्याउन भनेका थिए । ‘मैले प्रचण्डलाई संसद् पुन:स्थापनाजस्ता पुराना एजेन्डा छाडेर सहमतिका लागि नयाँ एजेन्डा ल्याउन भनेको छु,’ कोइरालाले पत्रकारसित भने ।
- कांग्रेसले प्रधानमन्त्री बाबुराम भट्टराईलाई निमन्त्रणा पठाइए पनि उनी अनुपस्थित रहे । प्रधानमन्त्री पोखरामा रहेका कारण आउन ढिला भएकाले चियापानमा उपस्थित हुन नसकेको बताइएको छ । यद्यपि, सरकारका केही मन्त्री चियापानमा सरिक भएका थिए ।
- कांग्रेसका नेता तथा कार्यकर्ता, शुभेच्छुकसँगै विभिन्न दलका शीर्ष नेताहरू, कर्मचारी, सुरक्षा निकाय, संवैधानिक निकाय र कूटनीतिक नियोगका प्रतिनिधिसहित व्यापारी, व्यवसायी, कलाकार, पत्रकारलगायतको कार्यक्रममा सहभागिता थियो ।
एमालेको आज
काठमाडौं : नेकपा एमालेले पनि विजयादशमी, दीपावली, इद, छठ तथा नेपाल सम्बत्का अवसरमा चियापान तथा शुभकामना आदान–प्रदान कार्यक्रम गर्दै छ । पार्टी कार्यालय बल्खुमा मंगलबार दिउँसो गरिने कार्यक्रमको सबै तयारी पूरा भएको एमालेले जनाएको छ ।
दिउँसो १२ बजेदेखि ४ बजेसम्म चियापान कार्यक्रम गरिने केन्द्रीय कार्यालयका सचिव पर्शुमेघी गुरुङले जनाए । विभिन्न दलका नेता, संवैधानिक निकायका प्रमुख, कूटनीतिज्ञ, व्यापारी, नागरिक समाजका अगुवा, कलाकार, साहित्यकार, पत्रकारलगायतलाई एमालेले चियापानका लागि निम्तो गरेको छ ।
नेपालको पहिलो कम्युनिस्ट प्रधानमन्त्री तथा एमालेका तत्कालीन अध्यक्ष मनमोहन अधिकारीले हरेक वर्ष बडादसैँ, तिहार, इद, छठ तथा नेपाल सम्वतका अवसरमा चियापान गर्ने प्रचलन थालेका थिए । एमालेले त्यसलाई हरेक वर्ष निरन्तरता दिँदै आएको छ ।