बिहिवार, बैशाख १९, २०७६
बंगलादेश सरकारले नेपालबाट बिजुली किन्ने घोषणा गरे पनि त्यसका लागि नेपालका तर्फबाट हालसम्म ढिलाइ भएको पाइएको छ । ८ महिनाअघि बंगलादेशको ढाकामा भएको ऊर्जा सप्ताहमा सन् २०४० भित्र ९ हजार मेगावाट विद्युत् निर्यात गर्ने तथा नेपालका जलविद्युत् आयोजनामा लगानी गर्ने उल्लेख भए पनि नेपालका तर्फबाट भने यसका लागि हालसम्म कुनै पहल नगरेर ढिलाइ गरेको पाइएको हो ।
बंगलादेशको निजी क्षेत्रका स्वतन्त्र ऊर्जा उत्पादनकहरूको संस्था (विप्पा) को निमन्त्रणामा बंगलादेश पुगेका स्वतन्त्र ऊर्जा उत्पादकहरूको संस्था (इप्पान)को टोलीसँग बंगलादेशका अधिकारीहरूले नेपालले हालसम्म बिजुली निर्यातको सार्थक प्रयास नगरेको बताएका थिए । बंगलादेश विजुली ल्याउन कानुनी, नीतिगत तथा पूर्वाधार निर्माण गर्नुपर्ने भए पनि त्यसका लागि सार्थक प्रयास नगरेको उनीहरूको गुनासो थियो ।
बंगलादेशले १११० मेगावाटको सुनकोसी दोस्रो तथा ५३६ मेगावाटको सुनकोसी दोस्रो जलविद्युत् आयोजना बनाउन इच्छा व्यक्त गरे पनि त्यो प्रक्रिया पनि अघि बढेको छैन । उनीहरूले नेपाल–भारत–बंगलादेशको जोड्ने ४०० केभीको अन्तरदेशीय प्रसारणलाइन निर्माणका साथै भारत हुँदै जाने भए पनि सोअनुसारको अघि बढाउनका लागि सार्थक पहल हुन नसकेको पनि बताएका थिए । अनारमणिदेखि सिलगुढी हुँदै बंगलादेशको चटगाउँसम्म प्रसारणलाइन बनाएमा २३ किलोमिटरमै दुई देशबीचमा प्रसारण जोडिने अवस्था छ तर यसको पनि सार्थक पहल भएको छैन । बंगलादेशका अधिकारीहरूले ढिला भए पनि छिट्टै दुई देशबीच बैठक बस्न लागेकाले केही आशा जागे पनि विगतमा भने यस गाउँमा ढिलाइ भएको गुनासो गरेका थिए ।
बंगलादेशको मागअनुसार नेपालले विद्युत् बिक्री गर्न सकेमा यसको मूल्य झन्डै बार्षिक ३६ अर्ब रूपैयाँ बराबर हुने अनुमान गरिएको छ । बंगलादेशले भारतीय कम्पनी जीमएमआरले निर्माण गरिरहेको ९ सय मेगावाटको माथिल्लो कर्णाली जलविद्युत् आयोजनाको बिजुली किन्ने योजना भने अन्तिम चरणमा पुगेको टोलीलाई बताएको थियो ।
No comments:
Post a Comment