विद्युत प्राधिकरणको सहायक कम्पनीलाई विद्युत व्यापारको अनुमति

https://www.karobardaily.com/news/168927 

पुस ११, २०७८ आईतबार

सरकारले विद्युत व्यापारका लागि नेपाल विद्युत प्राधिकरणको सहायक कम्पनी नेपाल ऊर्जा व्यापार कम्पनी (एनपीटीसी) लाई अनुमति दिएको छ ।
२०७४ सालमा विद्युत प्राधिकरणले सहायक कम्पनीको एनपीटीसी गठन गरे पनि सरकारले यसलाई व्यापारको इजाजत दिएको थिएन तर मन्त्रिपरिषद्ले विद्युत व्यापारका लागि बल्ल स्वीकृति दिएको हो । शुक्रबार मन्त्रालयमा आयोजित पत्रकार सम्मेलनमा ऊर्जा, जलस्रोत तथा सिँचाइमन्त्री पम्फा भुसालले अनुमति दिएको बताइन् ।
इन्फ्रास्टक्चर बैंक (निफ्रा) तथा स्वतन्त्र ऊर्जा उत्पादकहरूको संस्था नेपाल (इपान) ले समेत विद्युत व्यापार अनुमतिका लागि ऊर्जा मन्त्रालयमा निवेदन दिएका छन् तर हालसम्म स्वीकृति पाएका छैनन् । मन्त्री भुसाल भने निजी क्षेत्रलाई समेत चाँडै अनुमतिपत्र दिइने बताउँछिन् ।
चार र्षअघि विद्युत प्राधिरणले मन्त्रालयमा निवेदन दिए पनि यसमा कानुनी व्यवस्था नभएको भन्दै हालसम्म अनुमतिपत्र दिएको थिए । प्रस्तावित विद्युत विधेयकमा भने विद्युत व्यापारका लागि निजी क्षेत्रलगायतलाई अनुमति दिन सकिने उल्लेख छ तर यो हाल संसद्मा विचाराधीन छ ।
विद्युत प्राधिकरणले दुई महिनाअघि मात्र ३९ मेगावाट विद्युत निर्यातका लागि अनुमति पाएर भारत निर्यात गरिरहेको थियो भने गत वर्ष भारतबाट ८ सय मेगावाटसम्म आयात गरेको थियो । चालू वर्षको हिउँदमा ५ सय मेगावाटसम्म आयात गर्ने लक्ष्य छ । हाल विद्युत प्राधिकरणलाई भारतीय पक्षले आधिकारिक निकाय (डिजिटनरी अर्थोरिटी) रूपमा विद्युत आयात निर्यातका लागि स्वीकृति दिएको छ । ऊर्जा मन्त्रालयका एक अधिकारीका अनुसार, विद्युत प्राधिकरणको सहायक कम्पनीले अनुमतिपत्र पाए पनि भारत पक्षबाट प्राधिकरणको सहायक कम्पनीलाई समेत व्यापारका लागि आधिकारिक निकायको रूपमा स्वीकृति नदिएसम्म तत्काल विद्युत व्यापारको सम्भावना भने छैन । सहायक कम्पनीको संरचना, हाल विद्युत प्राधिकरणले गरिरहेको विद्युत व्यापार सम्झौता (पीपीए) को व्यवस्थापन कसरी हुने, भारतीय पक्षले एक वटालाई विद्युत व्यापारका लागि आधिकारिक निकाय मानेकाले प्राधिकरणको सहायक कम्पनीसहित अन्यलाई व्यापारमा कसरी समावेश गर्ने भन्ने अन्योल छ ।