बिजुलीको महशुल घटाउँदैछौं : ऊर्जामन्त्री

https://www.karobardaily.com/news/163086 

कार्तिक १७, २०७८ बुधबार

स्थापना भएको २५ वर्षमा वैकल्पिक ऊर्जा प्रवद्र्धन केन्द्रबाट मात्र ३६ लाख घरधुरी लाभान्वित भएका छन् ।
मंगलबार काठमाडौंमा आयोजना गरेको रजत जयन्ती अवसरमा दिइएको जानकारी अनुसार २५ वर्षको अवधिमा नवीकरणीय ऊर्जाका प्रविधिमार्फत यति धेरै लाभान्वित भएका हुन् । केन्द्रका कार्यकारी निर्देशक डा. मधुसूदन अधिकारीले सरकार र विभिन्न विकास साझेदारको संयुक्त सहयोगमा तथा निजी क्षेत्र र स्थानीय सरकारसँगको सहकार्यमा सञ्चालित विभिन्न कार्यक्रममार्फत लघुजलविद्युत, सुधारिएको चुलो, सौर्य, वायोग्याँसलगायतका नवीकरणीय ऊर्जामार्फत ३६ लाख लाभाविन्त भएको जानकारी दिए ।
उनका अनुसार, लघुजलविद्युतमार्फत ३६ मेगावाट विद्युत उत्पादनमार्फत् २ लाख ४७ हजार घरधुरीले विद्युतीकरणको सेवा पाएका छन् भने ९ लाख ६१ हजार घरेलु सौर्य विद्युत प्रणाली र १६ लाख सुधारिएको चुलो जडान हुनुका साथै ११ हजार पानी घट्टको सुधार भएको छ ।
सहरीे क्षेत्रबाट निस्कने जैविक फोहोर, पोल्ट्रीफार्मबाट निस्कने सुली र गाईफार्मबाट निस्कने गोबरलगायतको प्रयोग ३ सय ४४ ठूलासहित ४ लाख ३३ हजार वायोग्यास प्लान्ट जडान भएको पनि केन्द्रले जनाएको छ ।
सार्वजनिक संस्था, विद्यालय, स्वास्थ्य चौकी, अस्पताल, सर्पदंश उपचार केन्द्र, वर्थिङ सेन्टरजस्ता संस्थामा कम्प्युटर तथा स्वास्थ्यसम्बन्धी उपकरण सञ्चालन गर्न देशभर झण्डै २ हजार ८ सय संस्थागत सौर्यऊर्जा प्रणाली जडान भएको तथा २ हजार ४ सयभन्दा बढी खानेपानी र सिँंचाइका लागि प्रयोग हुने पानी तान्ने सौर्यपम्प जडान भएको पनि उनले जानकारी दिए ।
रजत जयन्तीको अवसरमा आयोजित कार्यक्रममा बोल्दै ऊर्जामन्त्री पम्झा भुसालले नवीकरणीय ऊर्जाका प्रविधिमार्फत सबै जनतालाई दुई वर्षभित्र विद्युत पहुँच पु¥याउने बताइन् । २० युनिटसम्मको ऊर्जा सरकारले जनतलाई सित्तैमा दिएको जानकारी दिँदै उनले सरकारले विजुलीको महशुल घटाउँदै जाने रणनीति अपनाएको जानकारी दिए ।
उनका अनुसार, सिँचाइका लागि सरकारले निःशुल्क महशुलको व्यवस्थापन गर्न लागेको छ भने खपत बढाउनका लागि विद्युतीय गाडीको भन्सारलाई शून्य बनाउने लक्ष्यसहित अघि बढेको छ । उनले विद्युत व्यापारमा निजी क्षेत्रलाई संलग्न गराउनका लागि कार्यदल बनाएको जानकारीसमेत दिइन् । ऊर्जासचिव देवेन्द्र कार्कीले नवीकरणीय ऊर्जालाई सरकारले विशेष महत्व दिएको बताउँदै प्रवद्र्धन केन्द्रबारे सरकारले छुट्टै विधेयक बनाएर अघि बढेको जानकारी दिए ।
नेपालका लागि बेलायतका राजदूत निकोला पोलिटले दिगो ऊर्जाको पहुँच वृद्धि र स्वच्छ ऊर्जाको विकासका लागि बेलायत सरकारले नेपाल सरकारलाई सहयोग गरिरहेको बताइन् । नेपाल नवीकरणीय ऊर्जा ऊर्जा परिसंघका अध्यक्ष गुणराज ढकालले पछिल्लो समयमा केन्द्रले निजी क्षेत्रका प्रवद्र्धकहरूलाई परियोजनाहरूमा सहभागी गराउन छोडेको बताउँदै निजी क्षेत्रलाई केन्द्रले साथमा लिएर अघि बढ्नुपर्ने बताए ।
रजत जयन्तीको अवसर पारेर नवीकरणीय ऊर्जा क्षेत्रमा कार्यरत संघसंस्था तथा विभिन्न व्यक्तित्वलाई सम्मान गरिएको थियो । वीरगन्ज महानगरपालिकाको हस्क पावर नेपाल प्रालि, काठमाडौं महानगरपालिकाको घाम पावर नेपाल प्रालि र काठमाडौंको पृसु इलेक्ट्रोनिक्स प्रालिलाई सम्मान गरिएको थियो ।