राहुघाट समस्या समाधान गर्न समिति

काठमाडौं : नेपाल विद्युत् प्राधिकरणले निर्माण गर्न लागेको ३२ मेगावाटको राहुघाट जलविद्युत् आयोजनाको निर्माणमा समस्या देखिएपछि समाधानका लागि समिति गठन गरिएको छ ।
प्राधिकरणको सोमबार बसेको सञ्चालक समिति बैठकले सञ्चालक सदस्य मोहनराज पन्तको संयोजकत्वमा समिति गठन गरिएको हो । एक्जिम बैंकको सहयोगमा प्राधिकरणले बनाउन लागेको उक्त आयोजनाको सिभिल ठेकेदार कम्पनीले २० महिनाअघि भएको सम्झौताअनुसार गर्न नसक्दै भन्दै थप ५० प्रतिशत रकम वृद्धि गर्नुपर्ने माग गरेपछि आयोजना समस्यामा पर्दै आएको छ । भारतीय ठेकेदार कम्पनी आइभिआरसिएल लिमिटेडको उक्त मागबारे प्राधिकरण बोर्ड बैठकमा प्रस्ताव लाने प्रतिबद्धतापछि आयोजनाको काम सुचारु भएको थियो । कम्पनीले प्राधिकरणलाई पत्र लेख्दै ५० प्रतिशत थप गर्न माग गरेको थियो । लिमिटेडसँग ४ नोभेम्बर २०१० सम्झौता भएकोमा एक्जिम बैंकले भारतीय परामर्शदाताका रूपमा वाप्कोस लिमिटेडसँग २० फेब्रुअरी २०१२ मा ठेक्का सम्झौता कार्यावन्यनको स्वीकृतिमा ढिलाइ गरेको थियो । गत फागुनमा वाप्कोससँग सम्झौता भए पनि एक्जिम बैंकले गत भदौमा मात्र सम्झौता कार्यावन्यनको स्वीकृति दिएको थियो । स्वीकृतिपछि थप अध्ययन गरेर परामर्शदाताले वर्क अडर दिइसकेको छ । तर, विवादका कारणले समस्या देखिँदै आएको छ ।
०६८ साल फागुन महिनामा सुरु गरेर ४२ महिनाभित्र सिध्याउने लक्ष्य राखिएको आयोजना बल्ल सुरु भएको छ । उक्त आयोजना सुरु हुन नसक्दा आयोजनाको कार्यतालिका प्रभावित भइसकेको छ । ०७२ सालको जेठभित्र निर्माण पूरा गर्ने लक्ष्य राखिए पनि आयोजना सुरु नहुँदै विवादका कारणले ढिलाइ भएपछि आयोजनाको लागत र समय दुवै बढ्ने निश्चित भएको छ । (सौस)