एडिबीलाई दुई आयोजना अध्ययन गर्न दिइने

काठमाडौं : ११ सय मेगावाटको सुनकोसी दोस्रो र ५ सय ३६ मेगावाटको सुनकोसी तेस्रो जलाशययुक्त आयोजनाको अध्ययन गर्न एसियाली विकास बंैक (एडिबी) लाई दिने सहमति भएको छ । आइतबार एडिबीका प्रतिनिधिसँगको छलफलमा ऊर्जा मन्त्रालय अध्ययन गर्न दिनका लागि सकारात्मक देखिएको हो । दुई जलाशययुक्त आयोजनाको सम्भाव्यता र डिटेल इन्जिनियरिङ गर्नका लागि एडिबीले प्रस्ताव गरेको थियो । छलफलमा ऊर्जासचिव हरिराम कोइरालाले आफूहरू आयोजनाको अध्ययन अगाडि बढाउनका लागि एडिबीलाई दिन तयार रहेको बताएका थिए । एडिबीले ऊर्जा मन्त्रालयसँग ठूला आयोजना लगानी गर्न इच्छा देखाएपछि मन्त्रालयले दुई आयोजनाको प्रस्ताव गरेको थियो । अध्ययनका लागि चाहिने २० मिलियन डलर एडिबी आफँैले र बाँकी १० मिलियन डलर खोज्ने प्रतिबद्धतासमेत छलफलमा जनाएको छ ।
अर्थ मन्त्रालयले एडिबीले दिन लागेको ऋण स्वीकार गरेमा दुई जलाशययुक्त आयोजनाको अध्ययन अघि बढ्नेछ । तर, आयोजनाको अध्ययन ऋण लिएरभन्दा पनि अनुदानबाट गर्नुपर्नेमा अर्थ मन्त्रालयले जोड दिँदै आएको छ । यी दुवै आयोजनाको अध्ययनका लागि एडिबीले अनुदान दिनुपर्नेमा जोड दिए पनि यसबारे निर्णय भने भइसकेको छैन ।
ऊर्जाका अधिकारीले भने देशमा लोडसेडिङको समस्या भइरहेको बेला स्वदेशी खपतमै बनाउनुपर्ने र त्यसका लागि एडिबीले सहयोग गर्नुपर्ने प्रस्तावसमेत छलफलमा राखेका थिए ।