पुनर्निर्माणका लागि साढे १ खर्ब

१६ जेठ, २०७४ ९:३० बिहान    कारोबार संवाददाता   

समाचार प्रतिनिधि तस्विर

काठमाडौं : सरकारले भूकम्पपछिको पुनर्निर्माणका लागि १ खर्ब ४६ अर्ब १८ करोड बराबरको बजेट विनियोजन गरेको छ । संघीयता कार्यान्वयनपछिको दोस्रो प्राथमिकतामा पुनर्निर्माणलाई समावेश गर्दै सोमबार अर्थमन्त्री कृष्णबहादुर महराले बजेट विनियोजन गरेका हुन् ।

पाँच वर्षभित्र पुनर्निर्माण सक्ने गरी करिब ९ खर्ब ३८ अर्ब बजेट अनुमान गरिएको छ । यसको तुलनामा यो निकै नै कम बजेट हो । सार्वजनिक बजेटमा पुनर्निर्माणको बजेट कार्यान्वयनमा देखिएको समस्या नदोहोरिने गरी प्रक्रिया सरलीकरण गरिएको उल्लेख छ ।

बजेटमा भूकम्प प्रभावितको निजी आवास निर्माणका लागि वितरण गर्न लागिएको दोस्रो र तेस्रो किस्ता वितरण कार्यलाई तीव्रता दिइने छ । क्षतिग्रस्त पुरातात्विक सम्पदाहरूको पुनर्निर्माणलाई प्राथमिकताका साथ अघि बढाइएको उल्लेख गर्दै सम्पदाहरूको पुनर्निर्माणलाई प्राथमिकताका साथ अघि बढाइने तथा परम्परागत तथा स्थानीय सामग्रीको उपयोग गरी पुनर्निर्माणमा जोड दिइएको छ । 

बजेटमा पहिचान भइसकेका जोखिमयुक्त बस्तीहरूलाई सुरक्षित स्थानान्तरण गरी एकीकृत बस्तीको विकास गर्नुका साथै यस्ता बस्तीहरूमा खानेपानी, सडक, विद्यालय, स्वास्थ्य चौकी, सरसफाइ लगायतका आधारभूत पूर्वाधार निर्माण गरिने उल्लेख छ । भुकम्पबाट क्षतिग्रस्त शैक्षिक तथा स्वास्थ्य संरचनाहरूको पुनर्निर्माण दुई वर्षभित्र सम्पन्न गर्ने समेत बजेटमा उल्लेख गरिएको छ । 

http://www.karobardaily.com/news/79220