चुहावट साढे ३ प्रतिशत घट्यो

१४ फाल्गुन, २०७३ ९:५४ राति     भीम गौतम    0 + -

फाइल फोटो

काठाण्डौं: नेपाल विद्युत् प्राधिकरणको ग्राहक तथा वितरण निर्देशनालयले ३.६३ प्रतिशत चुहावट घटाएको छ । विद्युत् प्राधिकरणको २५.७८ प्रतिशत चुहावटमध्ये ग्राहक तथा वितरण निर्देशनालयको २०.३८ प्रतिशत रहेकोमा ६ महिनाकै अवधिमा यति धेरै अप्राविधिक (चोरी) चुहावट घढेको हो ।

विद्युत् प्राधिकरणका प्रवक्ता प्रवल अधिकारीका अनुसार, ग्राहक तथा वितरण निर्देशनालयमा २०.३८ प्रतिशत चुहावट रहेकोमा १७.७५ प्रतिशतमा घटेको छ ।

आव २०७२/०७३ मा ८ अर्ब २० करोड रुपैयाँ बराबर चुहावट भएकोमा ६ अर्ब बराबरको चुहावट हुने गरेको छ । विद्युत् प्रणालीमा ५१ सय गिगावाट आवर बिजुली उपलब्ध रहेकोमा १३ सय १५ युनिट चुहावट छ । 

विद्युत् प्राधिकरणका अनुसार, ग्राहक तथा वितरण निर्देशनालयअन्तर्गतको विराटनगर क्षेत्रीय कार्यालयमा १९.७८ प्रतिशत चुहावट रहेकोमा १६.७ प्रतिशत, जनकपुरमा ५२.२३ प्रतिशतबाट ३८.६१ प्रतिशत र हेटौंडामा १७.६४ प्रतिशत रहेकोमा १४.७९ प्रतिशतमा झरेको छ ।

त्यसैगरी काठमाडौं क्षेत्रीय कार्यालयमा ११.३१ प्रतिशत रहेकोमा ११.३७ प्रतिशत पुगेको छ भने पोखरामा १४.३८ प्रतिशतबाट १४.१६ प्रतिशत, नेपालगञ्जमा १५.६३ प्रतिशत रहेकोमा १४.८४, बुटवलमा १८.८७ प्रतिशत रहेकोमा १६.१२ र अत्तरिया क्षेत्रीय कार्यालयमा १३.२५ प्रतिशत रहेकोमा १३.३१ प्रतिशतमा झरेको विद्युत् प्राधिकरणले जनाएको छ ।

प्राधिकरणको तथ्यांकअनुसार, चुहावट बढी रहेकोमा जनकपुरमा १४ प्रतिशत घटेको छ भने काठमाडांैमा बढेको छ । पछिल्लो तीन महिना यता विशेष चुहावट नियन्त्रण अभियानसमेत गरिरहेको प्राधिकरणले चालू वर्षभित्र ३.५ प्रतिशत चोरी चुहावट घटाउने उद्देश्य राखेको छ ।

प्राधिकरणमा वितरणका साथै प्रसारण, उत्पादनलगायतका निर्देशनालयमा समेत चुहावट हुने गरेको छ । पछिल्लो समयमा विद्युत् प्राधिकरणले सञ्चालन गरेको चुहावट नियन्त्रणअन्तर्गत हालसम्म करिब ५० करोड असुल गरिसकेको छ ।

प्राधिकरणको प्रणालीमा कुल २ सय मेगावाट चुहावट हुने गरेको तथ्यांक छ । चालू आवभित्र चुहावट साविकको २५.७८ प्रतिशतबाट २२.२८ प्रतिशतमा झार्ने लक्ष्य छ । प्राधिकरणले प्रत्येक क्षेत्रीय कार्यालय र त्यस मातहतका वितरण केन्द्रलाई लक्ष्य दिएर अभियान अघि बढाएको छ ।

प्राधिकरणले काठमाडांै, जनकपुर, विराटनगर, बुटवल, पोखरा, नेपालगन्ज र अत्तरिया क्षेत्रीय कार्यालयमा अहिले चुहावट न्यूनीकरण अभियान अघि बढाएको छ ।

प्राधिकरणसँग प्राविधिक र अप्राविधिक चुहावटको एकिन तथ्यांक नभए पनि करिब १७ प्रतिशत अप्राविधिक र ८ प्रतिशतभन्दा बढी चोरी चुहावट हुने गरेको अनुमान छ । हाल एक प्रतिशत मात्रै चुहावट घटाउन सके ५ करोड युनिट बिजुली जोगिने प्राधिकरणले जनाएको छ ।

क्षेत्रीय कार्यालय            हाल (प्रतिशत)         घटेको (प्रतिशत)
विराटनगर                    १९.७८            १६.७
जनकपुर                    ५२.२३             ३८.६१ 
हेटौंडा                        १७.६४            १४.७९
काठमाडांै                    ११.३१             ११.३७ 
पोखरा                        १४.३८             १४.१६
नेपालगन्ज                    १५.६३            १४.८४
बुटवल                    १८.८७        १६.१२ 
अत्तरिया                    १३.२५        १३.३१
स्रोत : नेपाल विद्युत् प्राधिकरण

http://www.karobardaily.com/news/73385