बूढीगण्डकीमा कमिसनको खेल भएको भट्टराईको आरोप

०८ अषाढ, २०७४ ९:४३ बिहान   http://www.karobardaily.com/news/80154कारोबार संवाददाता 0 + -

समाचार प्रतिनिधि तस्विर

काठमाडौं : पूर्वप्रधानमन्त्री एवं नयाँ शक्ति नेपालका अध्यक्ष डा. बाबुराम भट्टराईले १२ सय मेगावाटको बूढीगण्डकी जलविद्युत् आयोजना चिनियाँ कम्पनीलाई दिइनुमा कमिसनको खेल भएको आरोप लगाएका छन् । 

बुधबार नयाँ शक्ति नेपालले बूढीगण्डकी जलविद्युत् र यसको मोडेलबारे आयोजित छलफल कार्यक्रममा प्रधानमन्त्रीले राजीनामा दिइसकेको अवस्थामा सबै प्रक्रियालाई लत्याएर कमिसनकै लागि चिनियाँ कम्पनीलाई दिइएको आरोप लगाए ।

राजनीतिक दलका प्रतिनिधि, जलविद्युत् क्षेत्रका विज्ञ र सरोकार सहभागी कार्यक्रममा पूर्वप्रधानमन्त्री भट्टराईले स्वदेशी लगानीमा बन्ने आयोजनालाई रातारात विदेशीलाई दिँदासमेत ठूला दलको मुख टालिनु रहस्यमय भएको बताउँदै यसले राजनीतिक दलको निष्ठामा गम्भीर प्रश्न उठेको बताए ।

सत्तापक्षको निर्णयप्रति प्रतिपक्षीले विरोध र आलोचना गर्नुपर्नेमा कोही नबोल्नुले यसमा सबैको मिलोमतो देखिन्छ, यो ठूला राजनीतिक दलहरूको सिन्डिकेट पनि हो ।” उनले भने, “कमिसनखोर प्रवृत्तिको शिकार बूढीगण्डकी बनेको छ, तै चुप, मै चुपको अवस्था अन्त्य हुनुपर्छ ।”

बैठकमा पूर्वजलस्रोत मन्त्री एवं कांग्रेस नेता लक्ष्मण घिमिरेले प्रधानमन्त्रीले राजीनामा दिइसकेको अवस्थामा ऊर्जामन्त्रीले एउटा ठेकेदार कम्पनीसँग सम्झौता गर्नु राष्ट्रको अपमान भएको टिप्पणी गरे । सबै प्रक्रिया पूरा नगरी गलत नियतले सम्झौता गरिएको भन्दै उनले प्रतिपक्षीसमेत यसबारे चुप रहनुले मुलुक विपक्षीविहीन अवस्थामा पुगेको र प्रजातन्त्र छकि छैन भन्ने प्रश्न उठेको बताए ।

कांग्रेस सचेतक चीनकाजी श्रेष्ठले बूढीगण्डकी कम्पनी मोडेलमा नेपालले बनाउन सक्ने बताउँदै यसका लागि विदेशी कम्पनीलाई दिन आवश्यक नरहेको बताए । कार्यक्रममा राष्ट्रिय योजना आयोगका पूर्वउपाध्यक्ष दीपेन्द्रबहादुर क्षेत्री, स्वतन्त्र ऊर्जा उत्पादकहरूको संस्था (इप्पान) का उपाध्यक्ष कुमार पाण्डे, विज्ञहरू सन्तबहादुर पुन, रत्नेश्वर कायस्थलगायतले बूढीगण्डकी स्वदेशी लगानीमा बनाउन सकिने अवस्था रहेको बताए ।

ढीगण्डकीको बहुउद्देश्यीय फाइदाबारे चर्चा गर्दै बूढीगण्डकी विकास समितिका पूर्वअध्यक्ष डा. लक्ष्मीप्रसाद देवकोटाले अर्थ मन्त्रालय, ऊर्जा मन्त्रालय र सार्वजनिक खरिद कार्यालयको स्वीकृतिबिनै सिधै मन्त्रिपरिषद्बाट महत्वपूर्ण परियोजना दिइनु गैरजिम्मेवारीपनको नमुना भएको उनको भनाइ थियो ।