चुहावट नियन्त्रण गर्न प्राधिकरणमा कर्मचारी अभाव

भीम गौतम/राजधानी

काठमाडौं, २९ फागुन । नेपाल विद्युत् प्राधिकरणले चुहावट नियन्त्रणका लागि आवश्यक इन्जिनियर तथा प्राविधिक उपलब्ध नगराएपछि चालू आर्थिक वर्षभित्रै १ दशमलव ५ प्रतिशत चुहावट घटाउने लक्ष्य असफल हुने भएको छ ।
प्राधिकरणको ग्राहक तथा वित™ण निर्देशनालय कर्मचारी अभावमा चुहावट नियन्त्रण गर्न असफल हुने अवस्थामा पुगेको हो । दैनिक १२ घन्टा लोडसेडिङ हुँदा नेपाल विद्युत् प्राधिकरणको सबैभन्दा आलोचना हुने गरेको छ भने ६ अर्ब रुपैयाँभन्दा बढीको चुहावट हुँदा घाटामा रहेको प्राधिकरणको आर्थिक अवस्था झन् दयनीय बनेको छ ।
प्राधिकरण अधिकारीका अनुसार २५ दशमलव शून्य ४ प्रतिशत चुहावट रहेको प्राधिकरणले १० प्रतिशत मात्र घटाउन सके दुईदेखि तीन घन्टा घट्न सक्छ र प्राधिकरण आर्थिक धराशयी हुने अवस्थाबाट समेत जोगिन्छ ।
प्राधिकरण ग्राहक तथा वितरण निर्देशानालयका अनुसार ग्राहक तथा वितरण महानिर्देशालयमा मात्र ३ सय ९४ इन्जिनियर दरबन्दी छन् । तर, १ सय ३२ मात्र कार्यरत छन् । त्यसैगरी, इन्जिनियरहरूलाई सहयोग गर्न प्राविधिकतर्फ तह ५ मा ६ सय २३ दरबन्दी रहेकोमा २ सय ७७ मात्र कार्यरत छन् भने प्राविधक तह ४ मा ८ सय ५२ स्वीकृत दरबन्दी रहेकोमा ५ सय १ तथा तह ३ मा ८ सय ८६ स्वीकृत दरबन्दी रहेकोमा ७ सय ९१ कार्यरत छन् ।
प्राधिकरण ग्राहक तथा वित™ण निर्देशनालयले आफ्नै ८८ ओटा तथा विश्व बैक, एसियाली विकास बैंकलगायतका दातृ संस्थामार्फत गरी १ सयभन्दा बढी आयोजना सञ्चालित छन् । तर, १ सय ३२ जना इन्जिनियरकै भरमा १ सय आयोजनाका साथै तीन÷तीन महिनामा टीओटी मिटर निरीक्षण, डाउनलोड, विश्लेषणसहितको प्रतिवेदन दिनुपर्ने भएकाले चुहावट नियन्त्रण, टीओटी मिटर निरीक्षणलगायतका कार्य प्रभावित भएको निर्देशानालयका उपकार्यकारी निर्देशक रामचन्द्र पाण्डेले बताए । ‘चुहावट नियन्त्रण, टीओटी मिटर निरीक्षणलगायतका काममा जनशक्तिको अभावमा समस्या परेकै छ,’ पाण्डे भन्छन्, ‘जनशक्तिको अभावमा प्रतिफल प्राप्त गर्न सकेका छैन ।’
प्राधिकरणका २५ केभीएभन्दा बढी क्षमताको टीओटी मिटर लिने ग्राहकको संख्या ५ हजार छ । प्राधिकरणको विद्युत् वितरण नियमावलीमा २०० केभीएमुनिका ग्राहकको टीओटी मिटर ६/६ महिना तथा २०० केभीएमाथिका टीओटी मिटर तीन/तीन महिनामा निरीक्षण र डाउनलोड गर्नैपर्ने व्यवस्था छ ।
कर्मचारी अभावमा प्राधिकरणले आफ्नै नियमावलीसमेत कार्यान्वयन गर्न सकेको छैन । २०० केभीएमुनिका ३५ सय ग्राहक तथा २०० केभीएमाथिका ग्राहक १५ सय छन् । नियमावलीअनुसार टीओटी मिटर डाउनलोडका लागि मात्र १ सय १० इन्जिनियर थप चाहिन्छ । प्रत्येक वर्ष ७ सय टीओटी मिटर थपिने गरेका छन् ।
चुहावट नियन्त्रण, टीओटी मिटर डाउनलोडलगायत गर्न ५ सय ४ इन्जिनियर आवश्यक भए पनि १ सय ३२ मात्र भएपछि कर्मचारीको अभावमा दुवै कार्य प्रभावकारी रूपमा अघि बढाउन नसकिएको प्राधिकरणले जनाएको छ । स्वीकृत दरबन्दी अनुसारका कतिपय इन्जिनियरहरू सोर्सफोर्सका आधारमा प्राधिकरणका सहायक कम्पनीहरू माथिल्लो तामाकोसी, चिलिमे, प्रसारण लाइन आयोजनाहरूमा पठाइएपछि निर्देशनालय भने इन्जिनियरको बढी अभाव खेप्नुपरेको एक कर्मचारीले गुनासो पोखे ।

http://erajdhani.com/en/business/24196-2014-03-12-23-44-45