चीनसँगको बिप्पा मस्यौदा तयार

काठमाडौं\रास– सरकारले छिमेकी राष्ट्र चीनसँग गर्न लागिएको द्विपक्षीय व्यापार सम्झौता (बिप्पा) को मस्यौदा तयार पारेको छ ।चीन सरकारले मंसिर २०६८ मा नेपाललाई बिप्पाका लागि मस्यौदा पठाएकोमा उद्योग मन्त्रालयले बल्ल मस्यौदा तयार पारेको हो । उद्योगमन्त्री महेश बस्नेतले चीनसँगको बिप्पाको अन्तिम मस्यौदालाई स्वीकृत गरेपछि बिहीबार नै मस्यौदा चीन सरकारसमक्ष पठाउन मन्त्रालयले परराष्ट्र मन्त्रालयमा पठाएको छ ।

मन्त्रालयका सहसचिव महेश्वर न्यौपानेले छिमेकी राष्ट्र भारतसँग भएको बिप्पासँग मिल्दोजुल्दो गरी मस्यौदा तयार गरेको बताए । उनका अनुसार तीन वर्ष चीनले बिप्पाका लागि मस्यौदा पठाएकोमा सरोकारवाला मन्त्रालयसँग छलफल गरी मस्यौदालाई अन्तिम रूप दिइएको हो ।

परराष्ट्र मन्त्रालयले सो मस्यौदा चीन पठाएपछि दुवै देशबीच आपसी वार्ता भई बिप्पामा सम्झौता हुनेछ । अस्थिर सरकार तथा मन्त्रालयको ढिलाइका कारण तीन वर्षपछि मात्र नेपालले चीनसँगको बिप्पाका लागि मस्यौदा तयार पारेको हो । यसअघि नेपालले छिमेकी भारतसहित बेलायत, फिनल्यान्ड, मोरिससलगायतका ६ राष्ट्रसँग बिप्पा गरिसकेको छ ।

http://rajdhani.com.np/article/0050699001418347361