विद्युत् प्राधिकरणको अस्तव्यस्त भवन संरचना मिलाइँदै

एउटै निर्देशनालयका निकाय पाँच ठाउँसम्म

राजधानी समाचारदाता
काठमाडौं, १६ मंसिर

नेपाल विद्युत् प्राधिकरणको इन्जिनियरिङ सेवा निर्देशनालयका सबै निकाय पुग्न पाँच ठाउँसम्म धाउनुपर्छ । आफ्नो काम लिएर निर्देशनालय पुग्नेहरूका लागि कोठा खोज्दाखोज्दै हैरानी नै हुन्छ ।

सामान्य कुरासमेत मिलाउन नसक्ने अस्तव्यस्त प्राधिकरणको यो छरिएको संरचनालाई अब बल्ल व्यवस्थित र एकीकृत गरिने भएको छ । केन्द्रीय कार्यालय परिसरभित्र रहेका भवनहरूमा तलालाई आवश्यकको आधारमा पहिचान गरेर एउटै भवनभित्र र तला मिलाएर व्यवस्थित गर्न लागिएको हो ।

प्राधिकरणका अनुसार, इन्जिनियरिङ, योजना अनुगमन तथा सूचना प्रविधि, अर्थ, उत्पादन र प्रसारण लाइन निर्देशनालय र यसअन्तर्गतका निकायहरूलाई व्यवस्थित गर्न लागिएको हो । प्राधिकरणको काम कारबाहीमा सहज बनाउन तथा सेवाग्राहीलाई सजिलो पार्नका लागि व्यवस्थित गर्न लागिएको प्राधिकरणले जनाएको छ । ‘हेर्दा सामान्य हो तर अहिले प्राधिकरण निर्देशनालयका भवन संरचना अस्तव्यस्त जस्तै छ, यसलाई व्यवस्थित गर्न लागिएको हो,’ प्राधिकरणका कार्यकारी निर्देशक मुकेशराज काफ्लेले भने ।

हाल इन्जिनियरिङ निर्देशनालय र यसअन्तर्गतका निकायहरू प्राधिकरण प्रधान कार्यालयको भवन १, २ र ३ को क्रमशः एकदेखि पाँचौ तलासम्म छरिएर रहेकोमा अब भवन नम्बर १, २ र ३ को चौथो तला सबै र हाल नेपाल–भारत विद्युत् प्रसारण तथा व्यापार आयोजना रहेको कार्यालयसमेत समेटेर एकीकृत बनाउन लागिएको प्राधिकरणले जनाएको छ ।

यसैगरी, भवन नम्बर १ र २ को तेस्रो तलाका अतिरिक्त साविकको एलडीसी भवन एवं अन्यत्र पनि प्रसारण लाइन निर्देशनालयअन्र्तगतका कार्यालय रहेकाले भवन नम्बर १ र २ को तेस्रो तलामा प्रसारण निर्देशनको कार्यालय एकीकृत गर्न

लागिएको छ । यसैगरी भवन नम्बर १ र २ का प्रथम, दोस्रो र तेस्रो तलाका केही कोठाका साथै अर्थ भवनको पाँचौं तला र चारखालमा समेत योजना अनुगमन तथा सूचना प्रविधि निर्देशनालय रहेकोमा सूचना प्रविधि र विद्युत् व्यापार विभागलाई साविककै एलसीडी भवनको पहिलो र दोस्रो तला तथा अन्यलाई भवन नम्बर ३ को पहिलो, दोस्रो र भुइँ तलामा रहने गरी व्यवस्थित गरिएको प्राधिकरणले जनाएको छ ।

यसैगरी, प्रशासन निर्देशनालय र यसअन्तर्गतको कार्यकारी निर्देशकको कार्यकक्षलाई भवन नम्बर १ को भुइँतला, चारखालको माथिल्लो भवनमा व्यवस्थित गरिएको छ भने अर्थ निर्देशनालयलाई अर्थ भवनको भुइँ तला, पहिलो, दोस्रो, तेस्रो र चौथो तलामा राख्ने व्यवस्था गरिएको छ ।

प्राधिकरणले नयाँ संरचना कार्यान्वयनका लागि केन्द्रीय कार्यालयभित्र रहेका आयोजनाहरूको कार्यालयलाई हाताबाहिर सार्ने निर्णय प्राधिकरण व्यवस्थापनले गरेको छ ।

बजेट निकायमा पनि एकद्वार प्रणाली

नेपाल विद्युत् प्राधिकरणको विभिन्न योजना तथा कार्यक्रमका लागि आउने बजेट प्राधिकरण सम्बन्धित निकायले सीधै निकासा लिने गरेकोमा व्यवस्थापनले एकद्वार प्रणाली अपनाएको छ । मन्त्रालयबाट आएको बजेट सम्बन्धित क्षेत्रमै खर्च नहुने र रकमान्तर हुने समस्या देखिएपछि प्राधिकरण व्यवस्थापनले संस्थागत योजना तथा अनुगमन विभागको सिफारिसमा मात्र दिने निर्णय गरेको हो । अब विभागले आयोजनाका लागि भएको खर्चका आधारमा थप किस्ता उपलब्ध हुनेछ ।

http://www.rajdhani.com.np/article/0318513001417577666