जसले हारेर पनि जिते

भीम गौतम, दीपशंकर चौलागाईं\राजधानी
काठमाडौं\दोलखा, ८ मंसिर
४ मंसिरको चुनावअघि आ–आफ्नो पक्षमा भोट माग्दै हिँड्दा झापा–१ का एमाले उम्मेदवार रविन कोइराला र कांग्रेस उम्मेदवार विश्वप्रकाश शर्मा एकअर्काका कट्टर विरोधी बनेका थिए । उनीहरू दुवै एकले अर्काको कमजोरी खोज्दै आफ्नो पक्षमा जनमत सिर्जना गरिरहेका देखिन्थे । तर, मतगणनापछि त्यो दुश्मनी देखिएन ।

व्यक्तिगत रूपमै आरोप–प्रत्यारोपमा नउत्रिए पनि एक अर्का पार्टीबारे आलोचना र विरोध गर्दै भोट मागेका उनीहरूबीच चुनाव जितेपछि भने छुट्टै सद्भाव र सौहार्दता देखियो । जब कोइरालाले जितेको घोषणा गरियो, त्यसपछि शर्माले उनलाई माला लगाइदिएर बधाई तथा सम्मान गरे । ‘बधाई छ, रविन दाइ’ भन्दै शर्माले आफ्नो उच्च राजनीतिक संस्कार देखाए । लोकतान्त्रिक व्यवस्थामा हार र जितलाई उन्माद र प्रतिशोधमा नलिई जितेलगत्तै हार्नेले अंकमाल गर्दै बधाई दिएपछि एकाएक पक्षविपक्षमा उभिएका नेताहरूसमेत दंग परे । यस्तै दृश्य देखियो, दोलखामा पनि ।

दोलखा–१ बाट विजयी बनेलगत्तै एमाले नेता पार्वत गुरुङलाई प्रमुख प्रतिद्वन्द्वी रहेका कांग्रेस नेता जिपछिरिङ लामा शेर्पाले सबैभन्दा पहिला खादा ओढाएर अंकमाल गर्दै बधाई दिए । मतगणना जारी रहँदा नै बाहिर गई आफैंले खादा किनेर ल्याई शेर्पाले विजयी बनेका गुरुङलाई पहि¥याएर अंकमाल गर्दै बधाई दिए । पराजयको पीडालाई बिर्सेर शेर्पाले गुरुङको स्वागत र सम्मानमा कुनै कसुर बाँकी राखेनन् । एमालेका निवर्तमान जिल्ला अध्यक्ष पार्वत गुरुङले पनि जितको कुनै उन्माद देखाएनन् । उनले आफूलाई लगाएको माला र खादा झिकेर लामालाई लगाइदिए ।

गुरुङकी पत्नी सरस्वती राई गुरुङले पनि शेर्पालाई स्वागत गर्दै खादा लगाएर सम्मान गर्दै उच्च लोकतान्त्रिक संस्कार र चरित्र देखाइन् । त्यसैबेला शेर्पाले लोकतान्त्रिक संविधान निर्माण र समृद्ध दोलखा निर्माणका लागि गुरुङको अत्यन्तै सकारात्मक भूमिका रहने विश्वास आफूलाई रहेकाले त्यसको नेतृत्व लिन सुझाए ।

‘प्रजातान्त्रिक प्रक्रियामा जाँदा कहिले हार र कहिले जित हुन्छ, यो त स्वाभाविक प्रक्रिया हो, तर दोलखाली नागरिकले सामाजिक विकासमा निरन्तर लाग्ने जोसिला युवा नेता रोजेका छन्, तपाईंले दोलखाली जनताको त्यो भावनालाई पक्कै पनि कदर गर्नुहुनेछ,’ शेर्पाले भने । शेर्पामा त्यसबेला हारको कुनै पीडा देखिएको थिएन भने गुरुङले पनि जितको कुनै उन्माद नदेखाई सदाझंै सामान्य रूपमा प्रस्तुत भएका थिए । राजनीतिक संस्कारमा निकै अगाडि रहेका नवनिर्वाचित गुरुङ एमाले दोलखाको जिल्ला अध्यक्ष हुँदा पार्टी कार्यालयमै औपचारिक कार्यक्रम आयोजना गरी कांगे्रस सभापति सुशील कोइरालालाई बधाई तथा स्वागत गरेका थिए । विजयपछि सञ्चारकर्मीलाई प्रतिक्रिया दिँदै गुरुङले पार्टीको मूलधारमा रही लोकतान्त्रिक संविधान निर्माण र बेरोजगारी समस्याको समधान गरी विकास निर्माणका काममा आप्mनो सम्पूर्ण समय व्यतीत गर्ने बताए ।

मतगणनाअघिसम्म उनीहरूबीच एकअर्काले ‘बुथ कब्जा’ गरेको आरोपसमेत लगाएका थिए, तर परिणाम घोषणापछि प्रतिस्पर्धीले विजयीलाई सम्मान गरेको दृश्य सबैका लागि उदाहरणीय बनेको छ । यस्तै, दोलखा २ बाट विजयी एमालेका आनन्दप्रसाद पोखरेललाई कांग्रेसका ताराबहादुर कोइरालाले सबैभन्दा पहिला बधाई दिएर सबैको मन जितेका छन् । त्यसैगरी, एमाले महासचिव तथा काठमाडौं–५ का उम्मेदवार ईश्वर पोखरेलले पनि सोही क्षेत्रबाट विजयी भएका कांग्रेस नेता नरहरि आचार्यलाई तत्कालै विज्ञप्ति जारी गरेर बधाई दिए ।

एमालेकै प्रचार विभाग प्रमुख प्रदीप ज्ञवालीले गुल्मी–२ मा पराजित भएलगत्तै विज्ञप्ति जारी गरी सबैको मन छुने गरी विजयी उम्मेदवार चन्द्र भण्डारीलाई बधाई दिए । यस्तै, काठमाडौं–३ का कांग्रेस उम्मेदवार चक्रबहादुर ठकुरीले सोही क्षेत्रबाट विजयी एमाले नेता रामेश्वर फुयाँल, काठमाडौं–६ का एमाले उम्मेदवार योगेश भट्टराईले विजयी कांग्रेसका भीमसेनदास प्रधान, काठमाडौं–९ का पराजित उम्मेदवार एवं एमाले नेता कृष्णगोपाल श्रेष्ठले विज्ञप्ति नै जारी गरी विजयी उम्मेदवारलाई दिएको बधाई तथा सम्मान पनि धेरैका लागि प्रशंसनीय बनेको छ ।

यसैगरी, ललितपुर–३ का एमाले उम्मेदवार रघुजी पन्तले विजयी कांग्रेस उम्मेदवार मदन अमात्यलाई, सिन्धुपाल्चोक–१ का एमाले उम्मेदवार अरुण नेपालले विजयी कांग्रेसका मोहनबहादुर बस्नेत, मोरङ–१ का आमोद उपाध्यायले सोही क्षेत्रबाट विजयी एमालेका ऋषिकेश पोखरेललाई, मोरङ–९ का एमाले उम्मेदवार घनश्याम खतिवडाले विजयी कांग्रेसका उम्मेदवार डिकबहादुर लिम्बूलगायतलाई गरेको सम्मान तथा बधाई पनि निकै चर्चित बनेको छ ।

खतिवडाले त लिम्बसँगै बसेर खिचेको तस्बिर नै राखेर सामाजिक सञ्जालबाट समेत सबैको ध्यान खिच्ने गरी बधाई दिएका छन् । बहुदलीय व्यवस्थाको आगमनपछिका वर्षहरूमा भएका निर्वाचन तथा त्यसपछि एकअर्का दलबीच विवाद, झगडा र प्रतिशोध देखिए पनि २०७० सालको दोस्रो संविधानसभाको चुनावमा भने प्रतिस्पर्धीहरूबीच सौहार्द र सद्भावपूर्ण वातावरण देखियो । कतिपयले विज्ञप्ति निकालेर त कतिपय प्रतिस्पर्धीले विजयी उम्मेदवारलाई फेसबुक तथा भेटेर नै बधाई दिएका छन् । यसले जनताबीच गएर भोट मागेपछि आएको परिणामलाई सहर्ष स्विकार्नुपर्ने र जितहारलाई जीवनमरणको सवाल बनाउने विगतको अवस्थालाई अन्त्य गर्न पाठ सिकाएको छ ।

दोस्रो संविधानसभाको चुनावबाट आएको परिणामलाई नस्विकार्ने एकीकृत माओवादीको निर्णयलाई समेत कतिपय प्रतिस्पर्धी कांग्रेस–एमाले उम्मेदवारहरूबीचको हार्दिकता र सद्भावले चुनौती दिएको छ ।

http://erajdhani.com/en/component/content/article/40-2013-01-07-17-38-33/18283----