प्राधिकरणको अर्को प्रकरण

• 
  
• सामान हिनामिनाको आरोपमा पूर्व कर्मचारी हिरासतमास्टोरभित्रका सामान बिक्री गरेको आरोप
• एक करोडको दाबी गर्दै प्राधिकरण मुद्दा दायर गर्ने तयारीमा

भीम गौतम\राजधानी
काठमाडौं, २८ कात्तिक
नेपाल विद्युत प्राधिकरण ग्राहक तथा वितरण विभागको मध्य वितरण केन्द्रमा कार्यरत रहँदा जिन्सी सामान हिनामिना गरेको आरोपमा तत्कालीन बरिष्ठ सहायक अर्जुनबहादुर केसीलाई अख्तियार दुरुपयोग अनुसन्धान आयोगले हिरासतमा लिएको छ ।

प्राधिकरणमा ट्रान्सफर्मर प्रकरणमा अनियमितता भएको भन्दै उच्च अधिकारी लगायतका कर्मचारीहरुविरुद्ध अख्तियारले पक्राउ गरी विशेष अदालतमा मुद्दा विचाराधीन रहेको अवस्थामा सामान हिनामिना गरेको अभियोगमा अर्का पुर्व कर्मचारीलाई हिरासतमा लिएको हो । अख्तियारका अनुसार, केन्द्रको स्टोर इन्चार्ज रहँदा केसीले ६३ लाख १० हजार ५ सय ४२ रुपैयाँ बराबर हिनामिना गरेको आरोप छ । स्टोरमा रहेका सामानहरु गायब भएपछि उनीविरुद्ध अख्तियारले अनुसन्धान गरिरहेको थियो ।

आयोग ऐन, २०४८ को दफा १९ (४) बमोजिम धरौटी वा जेथा जमानी माग गरिएकोमा निजले सो बराबरको धरौटी रकम बुझाउन नसकेकोले अनुसन्धानको सिलसिलामा हिरासतमा राखेको अख्तियारका प्रवक्ता श्रीधर सापकोटाद्धारा बिहीबार जारी विज्ञप्तिमा उल्लेख छ । डेढ बर्ष अघि हिनामिनामा रहेको तथ्य सार्वजनिक भएपछि प्राधिकरणले केसीलाई कार्बाही गर्दै अवकाश दिएको थियो । मध्य वितरण केन्द्रमा दीपक आचार्य सरुवा भएपछि केसीको हिनामिना खुलासा भएको थियो ।

करिब ५ बर्ष स्टोरमा कार्यरत रहँदा केसीले टीओडी मिटर, ट्रान्सफर्मर, आल्मुनियम तार, पोल, कण्डक्टर लगायतका सामान हिनामिना गरेका थिए । प्राधिकरणभित्रको स्टोरमा रहेका सामानहरु उनले बाहिर विक्री गरेको प्राधिकरणले गरेको छानवीनको क्रममा देखिएको थियो । उनलाई प्राधिकरणले ६५ लाख रुपैयाँ बराबरको रकम हिनामिना ठहर्याउँदै असुल गर्ने कागज समेत गराएको थियो । रकम दिन नसकेपछि प्राधिकरणले हिनामिना र जरीवाना रकमसहित करिब एक करोड रुपैयाँ रकम दाबी गर्दै सरकारी बाँकी सरह असुल उपरका लागि सर्वोच्च अदालतमा मुद्दा दायर गर्ने तयारी गरेको छ ।

केसीविरुद्ध समेत अख्तियारमा समेत उजुरी परेपछि प्राधिकरणले उनले गरेको हिनामिनाबारे अख्तियारलाई फाइल बुझाएको थियो । त्यसपछि अख्तियारद्धारा अनुसन्धान अघि बढाउँदा उनले ६३ लाख बराबरको हिनामिना गरेको ठहर गरी हिसारतमा राखेको हो । केसी स्टोरमा रहँदा गायब भएका टीओटी मिटर लगायतको दुरुपयोग हुन सक्ने भन्दै प्राधिकरण त्यस उपर समेत निगरानी गरिरहेको छ ।

प्राधिकरणका एक अधिकारीका अनुसार, उद्योग व्यवसायीहरुले कम मिटर देखाउनका लागि ती टीओटी मिटरको दुरुपयोग गर्न सक्ने अवस्था छ । ट्रानसफर्मर, पोल जस्ता समेत स्टोरबाट गायब भएकोले यसमा थप रहस्य हुन सक्ने प्राधिकरणले जनाएको छ । ‘पोल र ट्रान्सफर्मर जस्ता गायब हुनु नपर्ने हो, राम्ररी तथ्यांक नराखिएको वा के हो तर साच्चीकै बाहिर विक्री भएको भए यो समस्या गम्भीर हो ।’–ती अधिकारीले भने ।

http://erajdhani.com/en/business/17858---------