उम्मेदवारलाई तिहारभन्दा भोट’कै चिन्ता

भीम गौतम\राजधानी
काठमाडौं, १६ कार्तिक
    नेपालीको चाड तिहार सुरु भैसकेको छ । परम्परा अनुसार, तिहारमा काग, कुकुर, गाई, गोरु पुजाका लागि सक्रिय हुनुहुपर्ने काठमाडौका उम्मेदवारहरुको दैनिक भोट माग्न व्यस्त छ ।
    प्रमुख दलमध्ये एकीकृत माओवादीका उम्मेदवारमध्ये कमले मात्र तिहार बनाउँछन् तर नेपाली कांग्रेस र एमालेका अधिकांश उम्मेदवारहरु आफ्नो गच्छे अनुसार तिहार मनाउने गर्छन तर यसपालीको तिहारभन्दा उनीहरुलाई चुनावले बढी छोएको छ । शुक्रबार काग तिहार र शनिबार कुकुर तिहार सकिएपनि काठमाडौमा अधिकांश उम्मेदवार भोट माग्नमै व्यस्त थिए । तिहारभरि अधिकांश उम्मेदवारहरु तिहार मनाउनेभन्दा पनि भोट माग्नमै सक्रिय हुन योजना बनाएका छन् ।
    चुनावी प्रचारप्रसारको लागि घरदैलो कार्यक्रममा सहभागी भएका उम्मेदवाहरुले तिहारभरि कम घरदैलो कार्यक्रम गर्ने जनाएपनि देउसी, भैलो, सामुहिक मिटिङ, सांस्कृतिक कार्यक्रम लगायतमार्फत भोट माग्ने योजना बनाएका छन् । उनीहरु सबैले आफ्नो पार्टीको पक्षमा भोट माग्दै देउसी भैलो खेल्नेछन् । उनीहरुले पार्टी र चुनाव चिन्हका नाममा भट्याएर देउसी र भैलीराम भनी भोट माग्नेछन् । उनीहरुको अनुसार, एकीकृत माओवादी, नेपाली कांग्रेस, नेकपा एमाले भैसीराम र देउसीरे भन्नेछन् ।
 एकीकृत माओवादीले तिहारभरि भेटघाटसहित देउसी, भैलो, सांस्कृतिक कार्यक्रममार्फत भोट माग्ने योजना बनाएको नेवा राज्य समितिका इन्चार्ज देवेन्द्र पौडेलले जानकारी दिए । ‘काठमाडौभरिका सबै आफ्ना उम्मेदवारहरुको कार्यक्रम भोट माग्नेनै छ ।’–उनले भने–‘तिहारलाई पनि भोट माग्नकै लागि समय बढी खर्चन्छौ, चुनाव नजिकिदै गएकोले हाम्रो बढी ध्यान भोट माग्नमै छ ।’ उनका अनुसार, एकीकृत माओवादीका सबै उम्मेदवारहरु तिहारको समयमा पनि सकेसम्म आफ्नो निर्वाचन क्षेत्रका टोल टोलमा पुग्नेछन् ।
    नेपाली कांग्रेसले चुनावी सभा, कार्यक्रम र घरदैलोभन्दा सामुहिक मिटिङ, भेटघाट र देउसी, भैलोमार्फतनै आफ्नो पार्टीको पक्षमा भोट माग्ने योजना बनाएको छ । ‘काठमाण्डौका सबै क्षेत्रका कांग्रेसका उम्मेदवारहरु बढी भेटघाटमै व्यस्त हुने योजना छ, संविधानसभाको चुनाव भएकोले आफ्नो पार्टीलाई जिताउनका लागि तिहारको भन्दा पनि भोटकै बढी चिन्ता हुनु स्वभाविक हो ।’–कांग्रेस काठमाडौका सभापति भीमसेनदास प्रधानले भने–‘तिहारको रमझम र माहोललाई डिस्टर्ब गर्नेभन्दा पनि साईलेन्स रुपमा भेटघाट र देउसीभैलोमार्फत भोट माग्नका लागि हाम्रो कार्यक्रम केन्द्रित हुन्छ ।’ उनका अनुसार, उम्मेदवारहरु परम्परा अनुसार, तिहार मनाएर बाँकी समय आफन्तका साथै अन्यसँग चुनावी रणनीति र योजना बनाउनकै लागि बढी केन्द्रित हुनेछन् ।
एमालेका काठमाण्डौ क्षेत्रका उम्मेदवारहरु पनि भोट माग्नमै तिहारभरि व्यस्त हुने एमाले काठमाडौ अध्यक्ष निर्मल कुईकेलले भने । ‘तिहारलाई एमाले जिताउने चाडको रुपमा रुपान्तरण गर्न लागेका छौ ।’–अध्यक्ष कुईकेलले भने–‘तिहारमा पनि पूर्ण रुपमा पार्टी पक्षमा भोट माग्नका लागि केन्द्रित हुन्छ, चुनाव नजिक भएकोले तिहारभन्दा बढी चिन्ता आफ्नो पार्टीलाई जिताउनेनै छ ।’
    हालसम्म बढी घरदैलोमै केन्द्रित बनेका दलहरुले लक्ष्मीपुजादेखि भने परम्परालाई धान्दै देउसी, भैलो लगायतमार्फत भोट मागेर जनतालाई आफ्नो पक्षमा आकर्षित गर्न देशका चर्चित कलाकारहरुलाई समेत उपयोग गर्ने योजना बनाएका छन् ।