ठेकेदारको लापरबाहीले कुलेखानी तेस्रोको निर्माण अन्योलमा

ठेकेदार कम्पनीसँग सम्झौता तोड्ने तयारी

भीम गौतम /राजधानी
काठमाडौं, ९ साउन

निर्माणाधीन कुलेखानी तेस्रो जलाशययुक्त जलविद्युत् आयोजनाको हाइड्रो मेकानिकल÷इलेक्ट्रो मेकानिकल ठेकेदार कम्पनीका कारण निर्माण अन्योलमा परेको छ ।

२०६८ सालमै निर्माण सम्पन्न हुनुपर्ने १४ मेगावाटको सो जलविद्युत् आयोजना हाइड्रो मेकानिकल÷इलेक्ट्रो मेकानिकलको ठेक्का लिएको चीनको झिजियाङ जिनलुन कम्पनीले काममा ढिलाइ गरेपछि आयोजना निर्माणको काम पछि धकेलिएको हो । झिजियाङ आफैँ उपस्थित नभएर हुलास स्टिल इन्डस्ट्रिजलाई स्थानीय एजेन्टको रूपमा काम गराई कम्पनीले बेवास्ता गर्दै आएको छ ।

झिजियाङको लापरबाहीका कारण इलेक्ट्रो मेकानिकलको काम नगरेपछि कुलेखानी तेस्रोको म्याद पटक पटक थपिँदै आएको छ भने लागत पनि दोब्बर पुग्न लागेको छ । सो ठेकेदार कम्पनीले १४ असार २०७१ भित्र काम सम्पन्न गर्नुपर्ने म्याद थियो । हाइड्रो÷इलेक्ट्रो मेकानिकल ठेकेदार कम्पनीको कामप्रति परामर्शदाता असन्तुष्ट रहँदै आएको छ ।

‘हाइड्रो÷इलेक्ट्रो मेकानिकलको ठेकेदार कम्पनीले काममा ढिलाइ गर्दा मुख्य समस्या देखिएको छ ।’ आयोजना प्रमुख सञ्जीव मल्लले भने, ‘इलेक्ट्रो मेकानिकलको ठेकेदार कम्पनीले काम ढिलाइ गर्दा फेरि म्याद थप्नुपर्ने अवस्था आएको छ ।’ आयोजनाले १६ एप्रिल २०१६ सम्मका लागि म्याद थप्नका लागि नेपाल विद्युत् प्राधिकरण सञ्चालक समितिमा प्रस्ताव पेस भइसकेको छ ।

आयोजनाको सिभिल कार्य ९० प्रतिशत र हाइड्रो÷इलेक्ट्रो मेकानिकलको काम ७० प्रतिशत पूरा भएको छ । ठेकेदार कम्पनी झिजियाङले स्थानीय एजेन्टलाई मात्र छोडेर निर्माणमा लापरबाही गरेपछि आयोजनाले पटक पटक सो कम्पनीले समयमै काम सक्न पत्र पठाइसकेको छ । ‘झिजियाङले लापरबाही गरेर समयमै काम नगरेपछि ठेक्का सम्झौता तोड्नका लागि प्राधिकरणका उच्च अधिकारीहरूलाई पटक पटक अनुरोध गरिसकेका छाँै ।’ कुलेखानी आयोजना एक अधिकारीले भने, ‘ठेकेदार कम्पनीले सबै सामग्री र उपकरण झारिसकेकोले अब ठेक्का तोड्दा हुन्छ भनेर तयारी पनि गरिरहेका छाँै ।’ उनका अनुसार अहिलेकै गति कायम रहेमा थप्न प्रस्तावित समयमा पनि काम सम्पन्न हुँदैन ।

करिब ८० करोडमा ठेक्का लिएको झिजियाङले समयमै काम नगर्दा एक वर्षअघिदेखि दैनिक ४ लाखबराबरको जरिवाना तिरिरहेको छ तर ठेक्का सम्झौतामा त्यस्तो जरिवाना १० प्रतिशतभन्दा बढी नहुने उल्लेख भएकाले आठ करोड जरिवाना तिरिसकेको सो कम्पनीले थप जरिवाना नलाग्ने हुनाले निर्माणमा खासै चासो नदिएको गुनासो आयोजनाका अधिकारीहरूको छ । ढिलो हुने नाममा ठेक्कामा राखिराख्ने र काम गर्ने प्रवृत्तिको सट्टा ठेक्का तोडेर नयाँ ल्याएमा छिट्टै सम्पन्न हुने तर्क आयोजनाका धेरै अधिकारीहरूको छ तर आयोजना प्रमुख मल्ल ठेक्का तोडेर पुनः टेन्डर आह्वान गर्दा थप समय लाग्ने भएकाले तत्काल ठेक्का तोड्न अप्ठेरो परेको बताउँछन् ।

२०६४ चैतमा ४४ महिनाभित्र सम्पन्न गर्ने गरी २ अर्ब ४३ करोडको लागतमा निर्माण सुरु भएको आयोजनाको म्याद तीन पटक थपिसकेको छ भने लागत ४ अर्ब २२ करोड पुगिसकेको छ । आयोजनाले प्रस्ताव गरेको समय थप्दा लागत ५ अर्ब नाघ्ने निश्चित भएको छ । 

http://www.erajdhani.com/article/0234895001437879498