प्राधिकरणका निर्देशकसहित तीन अधिकृत हिरासतमा

भीम गौतम/राजधानी

काठमाडौं, ५ फागुन । अख्तियार दुरुपयोग अनुसन्धान आयोगले ट्रान्सफर्मर खरिदमा अनियमितता गरी भ्रष्टाचार गरेको अभियोगमा नेपाल विद्युत् प्राधिकरणका निर्देशक अष्टरत्न शाक्यसहित तीन अधिकृतलाई हिरासतमा लिएको छ ।
आर्थिक वर्ष २०६६/०६७ को लट नम्बर १४ मा चीनको सिचुवान डङफङ ट्रान्सफर्मर कम्पनी लिमिटेडद्वारा खरिद गरिएका ५ सय ७३ थान ट्रान्सफर्मर प्रकरणमा अख्तियारले कार्यकारी निर्देशकको सचिवालयका निर्देशक शाक्यसहित तीन अधिकृतलाई आइतबार पक्राउ गरी हिरासतमा लिएको हो ।
अख्तियारका सहायक प्रवक्ता केशव घिमिरेका अनुसार प्राधिकरण संस्थागत वित्तीय विभागका सहनिर्देशक डिल्लीरमण दाहाल र उपप्रबन्धक त्रिपुरारीप्रसाद सिंहलाई हिरासतमा लिइएको छ । ट्रान्सफर्मर खरिदबारे सोधपुछका लागि भन्दै बोलाइएका उनीहरूलाई अख्तियारले नियन्त्रणमा लिएको हो । अख्तियारले हिरासतमा लिएका तीनैजनाको वीर अस्पतालमा स्वास्थ्य परीक्षणसमेत गरेको छ ।
यसअघि अख्तियारले सिचुवानमार्फत नै खरिद गरिएको ट्रान्सफर्मर प्रकरणमा सो कम्पनीका नेपाली एजेन्ट इन्टर कन्टिनेन्टल बिजनेस नेटवर्कका प्रोपाइटर मणिनाथ ढकाललाई ५० लाख रुपैयाँ धरौटी मागेकोमा बुझाएपछि तारिखमा छाडिएको थियो । तीन ट्रान्सफर्मर खरिद प्रकरणमा करिब १ अर्ब रुपैयाँ बिगो दाबी गर्दै विशेष अदालतमा ४६ जनाविरुद्ध मुद्दा दायर गरिसकेको अख्तियारले छानबिनमा नपरेका ट्रान्सफर्मर खरिदबारे समेत छानबिन अघि बढाएको छ ।
प्राधिकरणद्वारा गुणस्तरहीन ट्रान्सफर्मरबारे गठित पूर्वसञ्चालक डा.केपी दुलाल उपसमितिको छानबिनमै नपरेका पाँच कम्पनीमध्ये सिचुवान पनि एक हो । गुणस्तरहीन ट्रान्सफर्मर प्रकरणमा संलग्न कर्मचारीबारे छानबिन गर्न पूर्वसञ्चालक सदस्य मोहनराज पन्तको संयोजकत्वमा गठित समितिले दिएको प्रतिवेदनमा अर्का पूर्वसञ्चालक सदस्य डा.दुलालको संयोजकत्वमा रहेको समितिले कम्पनीद्वारा खरिद ट्रान्सफर्मरहरू छानबिनमा नपरेको उल्लेख छ ।
प्रतिवेदनमा सिचुवानसहित पिपल्स इलेक्ट्रिक एलायन्स ग्रुप चीन, एसभीआर इलेक्ट्रिकल्स कम्पनी भारत तथा जेके होल्डिङ चीन र द वेम्स गु्रप ट्रेडिङ र सहवान्त इलेक्ट्रिक कम्पनी थाइल्यान्डद्वारा खरिद गरिएका ट्रान्सफर्मरहरू छानबिनमा नपरेको उल्लेख भए पनि अख्तियारले ती सबै कम्पनीमार्फत खरिद ट्रान्सफर्मरबारे अनुसन्धान अघि बढाइसकेको छ ।
पूर्वसञ्चालक मुकेश काङ्खले र डा.दुलालको संयोजकत्वमा गठित समितिले २०६३ देखि २०६८ सम्म ६ कम्पनीद्वारा खरिद गरिएका ४ हजार ६ सय ५७ ट्रान्सफर्मर गुणस्तरहीन भएको प्रतिवेदन दिएको थियो । कारबाहीका लागि प्राधिकरणले सो फाइल अख्तियारमा पठाएकोमा अख्तियारले उपसमितिले छानबिन नगरेका कम्पनीलाई समेत छानबिनको दायरामा ल्याएको हो ।

http://erajdhani.com/en/component/content/article/40-2013-01-07-17-38-33/22921-2014-02-17-00-31-31