पुनर्निर्माणका लागि विश्वका १५ हजार इन्जिनियर नेपालमा

भीम गौतम /राजधानी
काठमाडौं, २५ साउन

नेपालको पुनर्निर्माण र नव निर्माणका लागि इन्जिनियर्स विथआउट बोर्डरले विश्वका १५ हजार इन्जिनियर नेपालमा ल्याउने गरी सरकारसमक्ष प्रस्ताव गरेको छ ।१२ वैशाख र त्यसपछिको निरन्तर पराकम्पनका कारण भएको क्षतिको पुनर्निर्माण र नव निर्माणका लागि सहयोग गर्न बोर्डरले १५ हजार इन्जिनियर नेपालमा ल्याउने गरी प्रस्ताव गरेको हो ।

पाँच दिनअघि नेपाल आएर आइतबार मात्र फर्केका विथआउट बोर्डरका संस्थापक अध्यक्ष प्राध्यापक आमादे वर्ननाडले सरकारका विभिन्न निकायसँग भेटेर सो प्रस्ताव गरेका थिए ।

भूकम्पपछिको प्रकोपको पुनर्निर्माण तथा नवनिर्माणका लागि विश्वको अनुभवसहित प्राविधिक रूपमा सहयोग गर्ने गरी प्रस्ताव आएको प्रधानमन्त्रीका विपद् व्यवस्थापन सल्लाहकार डा. राम थपलियाले जानकारी दिए ।

भूगर्वविद्, वातावरणविद्, जलविद्युत्विद्, संरचनाविद्लगायत समेत इन्जिनियरिङ टिमले नेपालका इन्जिनियर तथा प्राविधिक जनशक्तिहरूलाई विश्वको अनुभवसहित प्राविधिक दक्षता र क्षमता अभिवृद्धिमा सहयोग गर्ने गरी प्रस्ताव गरेको छ ।

डा. वर्ननाडले डा. थपलियासहित राष्ट्रिय योजना आयोगका उपाध्यक्ष डा. गोविन्दराज पोखरेल, नास्टका उपाध्यक्ष डा. जीवराज पोखरेल, समाज कल्याण परिषद्का राकेश हमालका साथै नेपाल इन्जिनियरिङ एसोसिएसन, काठमाडौं विश्वविद्यालय, त्रिभुवन विश्वविद्यालयका पदाधिकारीसँग भेटेर इन्जिनियर्स विथआउट बोर्डर नेपालको पुनर्निर्माण र नव निर्माणका लागि प्राविधिक रूपमा सहयोग गर्न तयार रहेको बताएका थिए । संस्थापक अध्यक्ष वर्ननाड अमेरिकी राष्ट्रपति बाराक ओवामाका दक्षिण एसियाका दूतसमेत हुन् ।

अधिकांश अमेरिका, बेलायतलगायत विकसित राष्ट्रहरूका प्राविधिक जनशक्ति सहभागी हुने बोर्डर टिमले भूकम्पबाट अति प्रभावित गोर्खा, दोलखा, सिन्धुपाल्चोक, काभ्रे, नुवाकोटलगायत १४ जिल्लाका इन्जिनियरसँग सहकार्यमा पुनर्निर्माणका लागि सहयोग गर्नेछन् ।

सरकारले भूकम्पपछिको क्षति आँकलन गरी पाँच वर्षभित्र पुनर्निर्माण गरिसक्ने लक्ष्य राखेको छ भने पुनर्निर्माणका लागि तत्कालीन, मध्यकालीन र दीर्घकालीन योजना बनाइसकेको छ । राष्ट्रिय योजना आयोगले बनाएको सो कार्ययोजना अहिले मन्त्रिपरिषद्मा विचाराधीन अवस्थामा छ ।

त्यसैगरी, भूकम्प प्रतिरोधी संरचनाहरू मात्र निर्माण गर्ने उद्देश्यसहित सहरी विकास मन्त्रालयले भवन संहिता तथा मापदण्ड तयार गरिसकेको छ ।

भविष्यमा आउन सक्ने सम्भावित भूकम्पको जोखिमतालाई मध्यनजर राखेर अब बनाइने सबै संरचनाहरू भूकम्पप्रतिरोधी बनाउने सरकारी लक्ष्य रहेकोमा प्रस्ताव स्वीकार गरेर सरकारले अनुमति दिएमा विश्वभरका इन्जिनियर नेपाल आउनेछन् ।

‘विथआउट बोर्डरले प्रस्ताव गरेपछि अब कसरी उनीहरूलाई पुनर्निर्माणको सहयोगका लागि लगाउन सकिन्छ भनेर छलफल भइरहेको छ, उनीहरूलाई नेपालका इन्जिनियरसँग कसरी उपयोग गर्ने भनेर हामी छलफल गरेर प्रस्तावबारे निर्णय गर्छौं,’ विपद् सल्लाहकार डा. थपलियाले भने ।

http://www.erajdhani.com/article/0034478001439258792