प्राधिकरण कर्मचारीलाई सवा ८ करोडको बिजुली निःशुल्क

भीम गौतम/राजधानीकाठमाडौं, २० साउन

नेपाल विद्युत्् प्राधिकरणका कर्मचारीहरूले वर्षको ८ करोड २१ लाख ६८ हजार बराबरको बिजुली सित्तैमा पाउने गरेको पाइएको छ । २७ अर्ब घाटा पुगेको नेपाल विद्युत्् प्राधिकरणका कर्मचारीहरूले वर्षभरिमा यति ठुलो रकम बराबरको बिजुली सित्तैमा पाउने गरेका हुन् ।

प्राधिकरणले विद्युत्् महसुल निर्धारण समितिमा पेस गरेको प्रतिवेदनमा संस्थामा काम गर्ने कर्मचारीहरूको उत्प्रेरणा जगाउने अभिप्रायले विद्युत्् सुविधा उपलब्ध गराएको उल्लेख गर्दै शून्य विद्युत् महसुल नभएको उल्लेख गरिएको छ । प्राधिकरणका अनुसार करिब ११ हजार कर्मचारीले हिउँदको मंसिरदेखि वैशाखसम्म बढीमा ७५ युनिट तथा वर्षायामको जेठदेखि कात्तिकसम्म बढीमा १ सय २५ युनिट बिजुली सुविधाका रूपमा पाउने गरेका छन् । हिउँदमा मासिक ५ सय ८० का दरले ६ महिनाको ३ हजार ४ सय ८० तथा वर्षामा मासिक १ हजार १० रुपैयाँका दरले ६ हजार ६० रुपैयाँ गरी प्रतिकर्मचारीले वार्षिक रूपमा ९ हजार ५ सय ४० रुपैयाँ विद्युत् सुविधाबापत पाउने प्रतिवेदनमा उल्लेख छ । कर्मचारीको तलबबापत झन्डै ५ अर्ब तथा सवारी साधन खर्चबापत झन्डै ४० करोड बराबरको खर्च हुने प्राधिकरणमा विद्युत् चुहावट मात्र १० अर्ब रुपैयाँ बराबर रहेको छ । त्यसैगरी, प्राधिकरणमा रहेका पाँच कर्मचारी युनियनहरूका केन्द्रीय, क्षेत्रीय र जिल्ला कार्यालयहरूमा मात्र प्राधिकरणले टेलिफोन, फ्याक्स बराबर झन्डै १ करोड खर्च गर्ने गरेको पाइएको छ । प्राधिकरणले सबै कर्मचारी युनियनहरूको खर्च बेहोर्दै आएको छ । त्यसैगरी, प्राधिकरणले भारतबाट आयात विद्युत्को मूल्यान्तरमा मात्र प्रतियुनिट दुई रुपैयाँ घाटा छ ।

प्राधिकरण घाटामा गइरहेकाले सुविधा दिन नहुनेबारे बहस चलिरहेका बेला प्राधिकरण व्यवस्थापनले भने यसतर्फ चासो नदिएको भन्दै आलोचना हुँदै आएको छ । विद्युत् प्राधिकरणको कुल सम्पत्ति ८४ अर्ब ७१ करोड रुपैयाँ रहेको छ भने ऋण ८२ अर्ब ७० करोड छ । त्यसैगरी, प्राधिकरणले आफ्ना जलविद्युत् आयोजनाहरूमा ४७ अर्ब तथा सहायक कम्पनीहरूमा १२ अर्ब २९ करोड लगानी गरेको छ । हाल नेपालमा ७ सय १८ मेगावाट जलविद्युत् उत्पादन हुँदै आएकोमा निजी क्षेत्रबाहेक विद्युत् प्राधिकरणबाट मात्र ४ सय ५० मेगावाट विद्युत् उत्पादन हुँदै आएको छ । विद्युत् प्राधिकरणसँग विकल्पका रूपमा १४ मेगावाटको हेटौंडामा डिजेल प्लान्ट र ३९ मेगावाटको दुहबी मल्टिफ्युल पनि रहेको छ ।
http://www.erajdhani.com/article/0837814001438826906