विद्युत् प्राधिकरणको वर्षकै घाटा साढे ६ अर्ब

विद्युत्का लागि २० बर्से रणनीति  ऊर्जामन्त्री 

राजधानी समाचारदाता
काठमाडौं, १ भदौ

नेपाल विद्युत् प्राधिकरणको आर्थिक वर्ष २०७१÷०७२ को घाटा ६ अर्ब ५१ करोड ४० हजार रुपैयाँ भएको छ ।मंगलबार विद्युत् प्राधिकरणको वार्षिक प्रतिवेदन पेस गर्दै कार्यकारी निर्देशक मुकेशराज काफ्लेले सो जानकारी दिएका हुन् । प्रतिवेदनअनुसार, हालसम्मको सञ्चित घाटा २६ अर्ब ७९ करोड ८६ लाख रुपैयाँ पुगिसकेको छ । प्राधिकरणको आर्थिक वर्ष २०६७÷०६८ मा सरकारले २७ अर्ब रुपैयाँ घाटा अपलेखन गरेको थियो । त्यसपछि मात्र प्राधिकरणको घाटा झन्डै २७ अर्ब पुगेको छ ।

वार्षिक प्रतिवेदन अनुसार, अन्य स्रोतहरूबाट भएको आम्दानी २ अर्ब ८ करोड ५४ लाख रुपैयाँसहित प्राधिकरणको कुल आम्दानी आर्थिक वर्ष २०७१÷०७२ मा ३२ अर्ब ५६ करोड ८८ लाख रुपैयाँ पुगेको छ । त्यसैगरी प्राधिकरणको अघिल्लो वर्षसम्म सरकारप्रतिको दायित्व सेयर पुँजी ४९ अर्ब ६३ करोड १९ लाख रुपैयाँ पुगेको छ ।

प्राधिकरणका अनुसार, अघिल्लो आर्थिक वर्षमा ६ ओटा आयोजना निर्माण पूरा भई ४२ दशमलव १२ मेगावाट बिजुली थप भएको छ भने ४ सय ४२ मेगावाट बराबरका २३ आयोजनासँग विद्युत् खरिद सम्झौता (पीपीए) भएको छ । कार्यक्रममा कार्यकारी निर्देशक काफ्लेले प्रतिवेदन पेस गर्दै ग्राहकलाई प्रदान गरिने सेवालाई सर्वसुलभ बनाउन तथा गुनासो व्यवस्थापन गर्न ग्राहक सेवा स्थापना गरिने जानकारी दिएका थिए । उनले रिमोट मिटर रिडिङ प्रणाली र इन्टरनेटमा आधारित विलिङ प्रणालीलाई कार्यान्वयनमा ल्याइने पनि उद्घोष गरे ।

वार्षिक उत्सवको उद्घाटन गर्दै ऊर्जामन्त्री राधा ज्ञवालीले जलविद्युत्को समग्र विकासका लागि मन्त्रालयले २० बर्से विद्युत् रणनीति बनाइरहेको जानकारी दिए । उनले लोडसेडिङ अन्त्यका लागि सरकारले विशेष फोकस गरिरहेको बताइन् । प्राधिकरण सानातिना आयोजना छोडेर ठुला जलविद्युत् आयोजना निर्माणतर्फ केन्द्रित हुनुपर्ने बताइन् । कार्यक्रममा प्राधिकरणका उपकार्यकारी निर्देशक रामचन्द्र पाण्डे, विद्युत् प्राधिकरण युनियनका अध्यक्ष रामप्रसाद रिमाल, संघका अध्यक्ष जनार्दन भट्टराई, परिषद्का अध्यक्ष अमृतबहादुर खापुङ, संगठनका अध्यक्ष खगेन्द्र शाही, राष्ट्रिय संगठनका अध्यक्ष सीताराम थापालगायतले विद्युत् प्राधिकरणको अवस्था र भविष्यबारे चर्चा गरेका थिए ।

http://erajdhani.com/article/0445238001439945495