ऊर्जामन्त्रीको निर्देशनपछि धमाधम लाइन काटिँदै

कारोबार संवाददाता   

फाइल फोटो

नौ अर्ब बक्यौता उठाउन बाँकी

काठमाडौंः ऊर्जामन्त्री जनार्दन शर्माको निर्देशनपछि नेपाल विद्युत् प्राधिकरणले बक्यौता नतिर्ने ग्राहकको बिजुली लाइन धमाधम काट्न थालेको छ । 

बुधबार प्राधिकरणको वार्षिकोत्सवमा मन्त्री शर्माले बक्यौता बढी हुने ग्राहकको लाइन तीन दिनभित्र काट्न निर्देशन दिएसँगै प्राधिकरण सक्रिय भएको हो । 

प्राधिकरणको ग्राहक तथा वितरण निर्देशनालयका अनुसार, आइतबारसम्म २ करोड ९३ लाख बराबर बक्यौता तिर्न बाँकी २४८ ग्राहकको लाइन काटिएको छ ।

प्राधिकरणले अत्तरिया, जनकपुर, हेटौंडा र काठमाडौ क्षेत्रीय कार्यालयअन्तर्गतका ग्राहकको लाइन काटेको हो । कतिपय क्षेत्रीय कार्यालयले नयाँ महसुल समायोजन अनुसार बिलिङ गर्नका लागि प्राविधिक रूपमा केही परिवर्तन गर्नुपर्ने भएकाले बढी बक्यौता रहेका ग्राहकहरूको पहिचान गर्न गाह्रो भएको जनाएका छन् । 

यी कार्यालयले पनि सोमबारदेखि सुरु गर्ने प्राधिकरणले जनाएको छ । हालसम्म  ३ अर्ब ८० करोड सडकबत्ती र ३५ करोडको सरकारी  बक्यौता तथा नियमित दुई महिनाको रकमसहित ९ अर्ब बक्यौता उठाउन बाँकी रहेको प्राधिकरणले जनाएको छ । 

६० दिनभित्र बक्यौता नबुझाएमा मात्र विद्युत् प्राधिकरणले लाइन काट्ने गरेको छ । प्राधिकरण ग्राहक तथा वितरण निर्देशानालयका उपकार्यकारी निर्देशक गोपालबाबु भट्टराईले ९ अर्ब बक्यौता रहेको र बक्यौता नतिर्ने ग्राहको लाइन काट्ने क्रम जारी रहने जानकारी दिए । उनका अनुसार, मन्त्रीको निर्देशनपछि लाइन काट्ने क्रमलाई तीव्रता दिइएको छ । 

हालसम्म  ३ अर्ब ८० करोड सडकबत्ती र ३५ करोडको सरकारी  बक्यौता तथा नियमित दुई महिनाको रकमसहित ९ अर्ब बक्यौता उठाउन बाँकी रहेको प्राधिकरणले जनाएको छ । 

लाइन काटिनेमा अधिकांश उद्योग तथा विभिन्न संघसंस्था छन् । पहिलो चरणमा बढी बक्यौता रहने ग्राहकको लाइन काट्न सुरु गरिएको छ । लाइन काटिनेमा सर्वसाधारण ग्राहक भने कम छन् । अधिकांश ठूला उद्योग व्यवसायले बिजुली बक्यौता नतिरेको अहिले लाइन काटिएका ग्राहकको तथ्यांकले देखाएको छ । 
 

महेन्द्र मञ्जिलको बक्यौता ३७ लाख ३१ हजार 
प्राधिकरणले पूर्वमुमा बडामारानी रत्न शाह बस्ने नारायणहिटी दरबारको महेन्द्र मञ्जिलको लाइन पनि काटेको छ । महेन्द्र मञ्जिलले ३७ लाख ३१ हजार रूपैयाँ महसुल भुक्तानी गर्न बाँकी रहेकाले बिजुली लाइन काटिएको प्राधिकरणका कार्यकारी निर्देशक मुकेशराज काफ्लेले जानकारी दिए । 

“बक्यौता बढी हुने सबैको लाइन काट्न सुरु गरिएको छ, यसलाई निरन्तरता दिइनेछ,” उनले भने । आइतबार मात्रै झण्डै डेढ करोड रुपैयाँ बराबर बक्यौता भएका ग्राहकको लाइन काटिएको काफ्लेले जानकारी दिए ।

http://www.karobardaily.com/%E0%A4%8A%E0%A4%B0%E0%A5%8D%E0%A4%9C%E0%A4%BE%E0%A4%AE%E0%A4%A8%E0%A5%8D%E0%A4%A4%E0%A5%8D%E0%A4%B0%E0%A5%80%E0%A4%95%E0%A5%8B-%E0%A4%A8%E0%A4%BF%E0%A4%B0%E0%A5%8D%E0%A4%A6%E0%A5%87%E0%A4%B6%E0%A4%A8%E0%A4%AA%E0%A4%9B%E0%A4%BF-%E0%A4%A7%E0%A4%AE%E0%A4%BE%E0%A4%A7%E0%A4%AE-%E0%A4%B2%E0%A4%BE%E0%A4%87%E0%A4%A8-%E0%A4%95%E0%A4%BE%E0%A4%9F%E0%A4%BF%E0%A4%81%E0%A4%A6%E0%A5%88