१५ प्रतिशत भूकम्प प्रभावितलाई मात्र पहिलो किस्ता

कारोबार संवाददाता
काठमाडौं,  १८ साउन
सरकारले निजी घर निर्माणका लागि घोषणा गरेको दुई लाख अनुदानमध्ये हालसम्म १५ प्रतिशत भूकम्प प्रभावितले मात्र पहिलो किस्ताको रकम पाएका छन् ।
भूकम्प गएको १५ महिनापछि र अनुदान सम्झौता सुरु गरेको झण्डै ५ महिनापछि विस्तृत घरधुरी सर्भेक्षण सकिएका ११ जिल्लाका १५ प्रतिशतले मात्र पहिलो किस्ताको ५० हजार रुपैयाँ अनुदान पाएका हुन् । संघीय मामिला तथा स्थानीय विकास मन्त्रालयको तथ्यांकअनुसार पहिलो किस्ता पाउनेभन्दा अनुदान सम्झौता साढे चार गुणा बढी छ भने पुनर्निर्माणबारे गुनासो गर्नेको संख्या झण्डै तेब्बर छ ।
स्थानीय विकास मन्त्रालयका सहप्रवक्ता सीता परियारका अनुसार ११ जिल्लाका ५ लाख ३२ हजारमध्ये ३९ हजार ७ सय भूकम्प प्रभावितले मात्र अनुदान पाएका हुन् । हालसम्म अनुदान सम्झौता भने ६० प्रतिशतभन्दा बढी भूकम्प प्रभावितसँग भैसकेको मन्त्रालयले जनाएको छ । हालसम्म २ लाख ८२ हजार भूकम्प प्रभावितसँग यस्तो अनुदान सम्झौता भैसकेको छ । राष्टिय पुनर्निर्माण प्राधिकरणले दशैंअघि नै अनुदान र पहिलो किस्ताको रकम वितरण गरिसक्ने लक्ष्य राखेको छ ।
मन्त्रालयका अनुसार हालसम्म सबैभन्दा कम पहिलो किस्ता पाउने भूकम्प प्रभावितमा मकवानपुरका ६९ जना छन् भने बढी लिनेमा गोररखाका १७ हजार ६३१ छन् । पहिलो किस्ता पाएपछि मात्र भूकम्प प्रभावितले निजी घर निर्माण सुरु गर्ने भएकाले पुनर्निर्माणमा ढिलो हुने देखिएको छ ।