August 8, 2016 Categories ताजा समाचार, प्रमुख समाचार, बिजनेस
ठेकेदारद्वारा समयमै पूरा गर्न नसक्ने जानकारी
थप आयात नभए १२ घण्टाभन्दा बढी लोडसेडिङ
भीम गौतम
काठमाडौं, २३ साउन । निर्माणाधीन २२० केभीको ढल्केबर सबस्टेसन निर्धारित समयमा पूरा नहुने भएपछि भारतबाट थप बिजुली ल्याउन असम्भव देखिएको छ ।
काठमाडौं, २३ साउन । निर्माणाधीन २२० केभीको ढल्केबर सबस्टेसन निर्धारित समयमा पूरा नहुने भएपछि भारतबाट थप बिजुली ल्याउन असम्भव देखिएको छ ।
नेपाल र भारतबीच थप विद्युत् आयात गर्ने सहमति भए पनि पुसभित्र सबस्टेसनको काम सम्पन्न गर्ने लक्ष्य पूरा नभएकाले आगामी हिउँदमा पनि लोडसेडिङ बढ्ने अवस्था सिर्जना भएको छ ।
तत्कालीन प्रधानमन्त्री केपी ओलीको भारत भ्रमणमा तत्काल ८० मेगावाट र डिसेम्बरदेखि थप १२० मेगावाट विद्युत् ल्याउने सम्झौता भएको थियो ।
तर, सबस्टेसनको अभावमा बिजुली ल्याउन समस्या हुने देखिएको हो । सबस्टेसन निर्माण गरिरहेको ठेकेदार कम्पनीले डिसेम्बरभित्र निर्माण गर्न नसक्ने जानकारी नेपाल विद्युत् प्राधिकरणमा गराइसकेको छ ।
यसको विकल्पमा अघि बढाउन लागिएको मोबाइल सबस्टेसन निर्माणमा समेत समय लाग्ने भएकाले विद्युत् आयात थप जटिल बनेको छ ।
सम्झौताअनुसार विद्युत् आयात नगरे पनि नेपालले कबोल गरेअनुसार आयातीत बिजुलीको मूल्य अनिवार्य तिर्नुपर्ने हुन्छ । तर। यसको मूल्य भने तय भइसकेको छैन ।
आगामी हिउँदमा दैनिक ७ घण्टाभन्दा बढी लोडसेडिङ नबढाउने र त्यसका लागि भारतबाट आयात हुने थप विद्युत्लाई मुख्य आधार मानिएको छ ।
प्राधिकरणका कार्यकारी निर्देशक मुकेशराज काफ्लेले ठेकेदार कम्पनीले डिसेम्बरसम्ममा सबस्टेसन निर्माण पूरा गर्न नसक्ने जानकारी गराएकाले यसबारे कसरी अघि बढ्ने भन्नेमा छलफल भइरहेको जानकारी दिए ।
“ठेकेदार कम्पनीले डिसेम्बरभित्र बनाउन नसक्ने भनेर जानकारी गराएको छ, अब मोबाइल सबस्टेसन बनाउन केन्द्रित हुन्छौं,” उनले भने, “मोबाइल सबस्टेसन राख्न ५-६ महिना लाग्ने हो तर रातदिन खटेर भए पनि ४ महिनामै सम्पन्न गर्छौं ।”
उनले यसबारे भारतसँग पनि थप छलफल हुने जानकारी दिए । प्राधिकरणका अधिकारीहरूले सबस्टेसन समयमै निर्माण हुन असम्भव भएको ऊर्जा मन्त्रालयसँगको छलफलमा जानकारी गराइसकेका छन् ।
अब के गर्ने भन्नेमा प्रधानमन्त्री तथा मन्त्रिपरिषद् कार्यालयमा छलफल हुने बताइएको छ । नयाँ सरकारमा ऊर्जा मन्त्रालयको जिम्मेवारी पाउने मन्त्रीसँग यसबारे थप छलफल अघि बढाउने पक्षमा ऊर्जा मन्त्रालय देखिएको छ ।
आगामी हिउँदमा दैनिक ७ घण्टाभन्दा बढी लोडसेडिङ नबढाउने र त्यसका लागि भारतबाट आयात हुने थप विद्युत्लाई मुख्य आधार मानिएको छ ।
जसअन्तर्गत विद्युत् प्राधिकरणले ढल्केबर–मुजफ्फरपुर प्रशारण लाइनबाट आयात हुने बिजुली निकै महत्वपूर्ण छ । ढल्केबर सबस्टेसन नबनेमा हाल आयात भइरहेको ८० मेगावाटबाहेक बढी आयात गर्न सक्ने अवस्था छैन ।
ढल्केबर सबस्टेसनको ठेक्का पाएको सेन्ट्रल चाइना पावर ग्रिड कर्पोरेसनको काम सुस्त गतिमा अघि बढेपछि प्राधिकरणभित्र पनि के गर्ने भन्ने अन्योल बढेको छ ।
प्राधिकरणका अधिकारीका अनुसार हाल कटैयामार्फत १४० मेगावाट आयात भइरहेको छ । ढल्केबरबाट २ सय मेगावाट र यस क्षेत्रका सानिमा माईलगायत आयोजनाबाट गरी ३६० मेगावाटसम्म पुग्न सक्ने हुनाले हालको प्रणालीबाट सबस्टेसन नबनेसम्म आयात गर्न कठिन छ ।
भारतबाट थप बिजुली ल्याएर आगामी हिउँदमा लोडसेडिङ घटाउने विद्युत् प्राधिकरणको लक्ष्य भने द्रुतगतिमा मोबाइल सबस्टेसन निर्माण नगरेमा पूरा नहुने देखिएको छ ।
कार्यकारी निर्देशक काफ्लेले आगामी हिउँदमा लोडसेडिङ ७ घण्टामा झार्ने बताउँदै आएका छन् । तर, १ सय २० मेगावाट थप ल्याउन नसकेमा १२ घण्टाभन्दा बढ्ने सक्ने देखिएको छ ।
No comments:
Post a Comment