पहिलो किस्ता पाउने भूकम्पपीडित ३० हजार मात्र

भीम गौतम / राजधानी
काठमाडौं, २७ असार

निजी घर बनाउन सरकारले हालसम्म ३० हजार भूकम्पपीडितलाई अनुदानबापतको पहिलो किस्ता वितरण गरेको छ । राष्ट्रिय पुनर्निर्माण प्राधिकरणले भूकम्पबाट विशेष प्रभावित ११ जिल्लाका ३० हजार २ सय ६५ जनालाई मात्र पहिलो किस्ताबापतको ५० हजार अनुदान वितरण गरेको हो । सरकारले भूकम्पपीडितलाई २ लाख अनुदान दिने घोषणा गरेकोमा पहिलो किस्तामा ५० हजार तथा दोस्रो र तेस्रो किस्तामा ७० र ८० हजार दिने निर्णय गरिसकेको छ । संघीय मामिला तथा स्थानीय विकास मन्त्रालयका सहप्रवक्ता सीता परियारका अनुसार हालसम्म काठमाडांै उपत्यकाबाहेकका ११ जिल्लामा २ लाख ३३ हजार ९ सय ८४ भूकम्पपीडितसँग अनुदान सम्झौता गरे पनि पहिलो किस्ताको रकम भने थोरैले मात्र पाएका हुन् । सरकारले दु्रतगतिमा निजी आवास निर्माणका लागि अनुदान वितरण गर्ने लक्ष्य राखे पनि सुस्त गतिमा मात्र पुनर्निर्माणको काम अघि बढेको हो । ११ जिल्लाका ५ लाख ३३ हजार १ सय ५५ जनाले अनुदान पाउनुपर्नेमा अनुदान वितरण सुरु गरेको चार महिना बित्न लाग्दा आधासँग पनि अनुदान सम्झौता भएको छैन । अनुदान सम्झौता गरेर सरकारले घोषणा गरेको अनुदान पाउने ढुक्क भए पनि पहिलो किस्ता पाउने भूकम्पपीडितलाई मात्र निजी घर निर्माणका लागि सहज हुन्छ ।

अनुदान तथा पहिलो किस्ता पाउन पूरा गर्नुपर्ने प्रशासनिक प्रक्रियामा ढिलासुस्ती हुँदा पुनर्निर्माणमा ढिलाइ भएको पुनर्निर्माण प्राधिकरणका एक अधिकारीले जानकारी दिए । स्थानीय विकास मन्त्रालयका सहसचिव एवं प्रवक्ता पूर्णचन्द्र भट्टराईले आर्थिक वर्षको अन्तिम समय भएको र गाविस सचिवहरू अन्य काममा व्यस्त हुनुपरेकाले केही सुस्तता देखिएको बताए ।

‘आर्थिक वर्षको अन्त्यतिरको समय भएकाले गाविस सचिवहरू व्यस्त भएर अनुदान सम्झौता र पहिलो किस्ता पाउने थोरै देखिएका हुन्,’ उनले भने । स्थानीय विकास मन्त्रालयका अनुसार हालसम्म पहिलो किस्ता पाउने भूकम्पपीडितमा रामेछापका १ हजार १ सय ४, गोरखाका १० हजार ५ सय ९८, दोलखाका ८ हजार ८ सय १४, ओखलढुंगाका ५ सय ७७, सिन्धुपाल्चोकका १ हजार ७ सय ८० र धादिङका २ हजार ५ सय १५ छन् । यसैगरी, काभ्रेका ७ सय ८४, सिन्धुलीका १ हजार १ सय ७८, रसुवाका ७ सय ५ र नुवाकोटका २ हजार २ सय १० भूकम्पपीडितले मात्र पहिलो किस्ताको रकम पाएका छन् । मकवानपुरका १ हजार ४ सय ८० जनाले अनुदान सम्झौता गरे पनि हालसम्म पहिलो किस्ताको ५० हजार एक भूकम्पपीडितले पनि पाएका छैनन् । भूकम्प गएको १४ महिना बिते पनि हालसम्म सरकारको अनुदानले एउटा निजीसमेत बनेको छैन । दु्रतगतिमा अनुदान वितरण भएर निजी घर निर्माणको काम तीव्र हुने सरकार र प्राधिकरणले बारम्बार बताए पनि पहिलो किस्ता पाउनै ढिलाइ भएको छ ।

http://rajdhani.com.np/article/0071403001468286286