प्राधिकरणका कार्यकारी निर्देशकसहित थप १० पक्राउ

डिल्ली आचार्य, भीम गौतम\राजधानी
 काठमाडौ, ४ भदौ

ट्रान्सफर्मर खरिदमा भ्रष्टाचार गरेको भन्दै अख्तियार दुरूपयोग अनुसन्धान आयोगले नेपाल विद्युत् प्राधिकरणका कार्यकारी निर्देशक रामेश्वर यादवसहित १० उच्च अधिकारीलाई पक्राउ गरेको छ । प्राधिकरणले २०६७÷०६८ मा चीनको हुवेई सनलाइट इलेक्ट्रिक कम्पनीबाट दुई लटमा खरिद गरेको १ हजार २ सय ६० ओटा गुणस्तरहीन ट्रान्सफर्मरमा घोटाला गरी गैरकानुनी लाभ लिएको भन्दै मंगलबार अख्तियारले उनीहरूलाई नियन्त्रणमा लिएको हो । नियन्त्रणमा लिएलगत्तै उनीहरू सबैलाई सिंहदरबार प्रहरी प्रभागमा पठाइएको अख्तियारले जनाएको छ ।

घोटाला प्रकरणमा अख्तियारले प्राधिकरणका पूर्वकार्यकारी निर्देशक डा. जिवेन्द्र झा, पूर्वनिमित्त कार्यकारी निर्देशक टीकाराम बीसी, पूर्वमहाप्रबन्धक चिरन्जीवी शर्मा र तनहुँ हाइड्रोपावरका आयोजना प्रमुख महेशप्रसाद आचार्यलाई पक्राउ गरी हिरासतमा राखेको छ । ग्रिड विभागका निर्देशक देव शर्मा पौडेल, ग्राहक तथा वितरण जिन्सी व्यवस्थापन महाशाखाका प्रबन्धक कृष्णबहादुर थापा, उपनिर्देशक कृष्णबहादुर केसी, तत्कालीन काठमाडौं सुदृढीकरण आयोजनाका निमित्त प्रमुख प्रमोद रिजाल र वितरण तथा ग्राहक सेवाका लेखा अधिकृत सुशील खनाललाई पनि पक्राउ गरी हिरासतमा लिएको छ ।

कार्यकारी निर्देशक यादव तत्कालीन ग्राहक तथा वितरण सेवाको महाप्रबन्धक हुँदा उनको स्वीकृतिमा प्राधिकरणमार्फत तिर्नुपर्ने ११ करोड ५१ लाख ४४ हजार रूपैयाँ भुक्तानी गरिएको थियो । सो रकम कुल भुक्तानी गर्नुपर्ने रकमको ९० प्रतिशत भने बाँकी १० प्रतिशत अर्थात् ६४ लाख २० हजार रूपैयाँ तत्कालीन महाप्रबन्धक शर्माको स्वीकृतिमा भुक्तानी गरिएको थियो । २१ चैत २०६५ देखि २२ पुस २०६८ सम्म महाप्रबन्धक बनेका यादव १० वैशाख २०६८ सम्म निमित्त कार्यकारी निर्देशक थिए । उनी २०६९ मंसिरमा खुला प्रतिस्पर्धामार्फत प्राधिकरणको कार्यकारी निर्देशक बनेका थिए । पूर्वकार्यकारी निर्देशक झा भने २०६६ साल साउनदेखि २०६८ वैशाखसम्म प्राधिकरणको कार्यकारी निर्देशक बनेका थिए । यसैगरी, बीसी २०६८ पुसदेखि २०६९ जेठसम्म कार्यकारी निर्देशक बनेका थिए । विश्व बैंकको सहयोगमा खरिद गरिएको हुवेईको ट्रान्सफर्मरमा बाहिर तामा र भित्र आल्मुनियम भेटिएको थियो ।

यसअघि हुवेईमार्फत नै खरिद गरिएका ट्रान्सफर्मर खरिद प्रकरणमा हुवेईका दुई चिनियाँ प्रतिनिधिसहित प्राधिकरणका १४ कर्मचारीलाई अख्तियारले पक्राउ गरी अनुसन्धान गरिरहेको छ । कार्यकारी निर्देशकसहित यो प्रकरणमा पक्राउ पर्नेको संख्या २४ पुगेको छ । पूर्वसञ्चालकद्वय मुकेश काफ्ले र डा. केपी दुलालको छुट्टाछुट्टै प्रतिवेदनले २०६३ देखि २०६८ सम्ममा विभिन्न मुलुकबाट ४ हजार ६ सय ५७ थान ट्रान्सफर्मर गुणस्तरहीन देखिएको उल्लेख छ ।

अर्का पूर्वसञ्चालक सदस्य मोहनराज पन्तको संयोजकत्वमा रहेको समितिले कार्यकारी निर्देशक यादवसहित ३३ जना कार्यरत र पूर्वप्राधिकरण कर्मचारीलाई ट्रान्सफर्मर प्रकरणमा दोषी देखाएको थियो । प्राधिकरणमार्फत सहवन्त इलेक्ट्रिक कम्पनी लिमिटेड (थाइल्यान्ड), जेके होल्डिङ र सेनयाङ डोङजेङ इलेक्ट्रिसिटी इक्युपमेन्ट कम्पनी लिमिटेड (चीन), एसभीआर इलेक्ट्रिक प्रालि (भारत), निग्वो एयूएक्स हाइटेक्नोलोजी कम्पनी लिमिटेड (चीन) लगायतबाट खरिद गरिएका ट्रान्सफर्मरहरू गुणस्तरहीन भएको काफ्ले र दुलालले प्रतिवेदन दिएका छन् । अख्तियारले त्यो प्रकरणमा समेत उनीहरूमाथि अनुसन्धान गरिरहेको जनाएको छ ।

http://www.rajdhani.com.np/en/component/content/article/40-2013-01-07-17-38-33/13271------