तीन वर्षमै १ हजार मेगावाट विद्युत् थप

राजधानी समाचारदाता
काठमाडौं, २५ फागुन

जलविद्युत् उत्पादन सुरु भएको १ सय ४ वर्षमा ७ सय ५० मेगावाटको हाराहारीमा विद्युत् उत्पादन गरेको सरकारले आगामी तीन वर्षभित्रै १ हजार मेगावाट विद्युत् उत्पादन थप गर्ने लक्ष्य लिएको छ । एक वर्षभित्र आधारभूत रूपमा र दुई वर्षभित्र जलविद्युत्मार्फत् नै लोडसेडिङ अन्त्य गर्ने लक्ष्य राखेको सरकारले एक वर्षभित्र २ सय र २ वर्षभित्र ८ सय मेगावाट उत्पादन वृद्धि गरी १ हजार थप गर्ने लक्ष्य राखेको हो । ‘सरकारले तीन वर्षभित्र १ हजार मेगावाट थप गर्ने लक्ष्य राष्ट्रिय ऊर्जा संकट निवारण तथा विद्युत् विकास दशकसम्बन्धी अवधारणा पत्रसहितको कार्ययोजना तयार गरेको छ,’ ऊर्जा मन्त्रालयका सह–प्रवक्ता गोकर्णराज पन्थले भने ।

हाल विद्युत्को माग १४ सय मेगावाटको हाराहारीमा रहेकोमा ७ सय ७६ मेगावाट उत्पादन भएको छ भने अहिलेको हिउँदमा ३ सय ५० मेगावाटको हाराहारीमा मात्र उत्पादन भएको छ । ऊर्जा मन्त्रालयका अनुसार, ०७२ सालभित्र अर्थात् अबको एक महिनाभित्र ४ दशमलव ९५ मेगावाटको फावा, २ दशमलव ४८ मेगावाटको पिखुवा, २ मेगावाटको झ्याडी खोला, ६ मेगावाटको दरौदी खोला ए, ३ दशमलव २० मगावाटको गेलुङखोला, ४ मेगावाटको सार्दी खोला र सभा खोला, २ दशमलव ५० मेगावाटको छ्याङदी खोला र ४ दशमलव ३६ मेगावाट टुंगुन ठोस्ने जलविद्युत् आयोजना सम्पन्न गर्ने लक्ष्य छ ।

त्यसैगरी, यसै वर्षभित्र २ मेगावाटको खानीखोला, १३ मेगावाटको मड्क्यु, ११ दशमलव २० मेगावाटको थापाखोला, ५ मेगावाटको अपरमाईसी खोला, ३ दशमलव ७५ मेगावाटको द्वारी खोला र २२ दशमलव २० मेगावाटको अपरचाकु, ५० मेगावाटको अपर मस्र्याङ्दी र २५ मेगावाटको अपरमादी जलविद्युत् आयोजना निर्माण सम्पन्न गर्ने लक्ष्य राखेको छ ।

त्यसैगरी, ०७३ सालभित्र २ दशमलव ८३ मेगावाटको चाके, १ दशमलव ७५ मेगावाटको जुम्दी, १ दशमलव ५० मेगावाटको थेउले, ५ मेगावाटको ताडी, ५ मेगावाटको अपर मैलुङ ए, २० मेगावाटको तल्लो मोदी, २२ मेगावाटको अपरदोर्दी ए, ७ दशमलव ६० मेगावाटको जोगमाई, २ दशमलव १५ मेगावाटको अपर पराजुली, ४ दशमलव २० मेगावाटको लोहोरे, ३ मेगावाटको मिदिम करापु, ६ दशमलव ८० मेगावाटको रुदी ए, १३ दशमलव ७० मेगावाटको फलांखु खोला, ३ दशमलव ३३ मेगावाटको कपाडी गाड, ४ मेगावाटको घलेम्दी खोला र ४ मेगावाटको पुवाखोला १ जलविद्युत् आयोजना सम्पन्न गर्ने लक्ष्य छ ।

१० वर्षभित्र १० हजार मेगावाट विद्युत् उत्पादन गर्ने लक्ष्यसहितको सरकारले पारित गरेको छ । जस अनुसार, यस अवधिमा ५० प्रतिशत जलाशययुक्त आयोजनामार्फत, २५ देखि ३० प्रतिशतसम्म आरओआर, १५ देखि २० प्रतिशत पिकिङ आरओआर र १० प्रतिशत वैकल्पिकलगायत अन्य स्रोतबाट उत्पादन गर्ने लक्ष्य छ ।

हालसम्म २६ सय मेगावाट बराबर नेपाल विद्युत् प्राधिकरणमा विद्युत् खरिद सम्झौता (पीपीए) भइसकेको छ भने करिब ४ हजार मेगावाट आयोजना पीपीएको प्रतीक्षामा छन् । विद्युत् विकास विभागका अनुसार, ७९ आयोजनाले ५ हजार १ सय २८ मेगावाटका आयोजना सर्वेक्षण अनुमतिपत्र लिइसकेको जनाएको छ ।

यसै वर्षभित्र दुई मेगावाटको खानीखोला, १३ मेगावाटको मड्क्यु, ११ दशमलव २० मेगावाटको थापाखोला, पाँच मेगावाटको अपरमाईसी खोला, तीन दशमलव ७५ मेगावाटको द्वारी खोला र २२ दशमलव २० मेगावाटको अपरचाकु, ५० मेगावाटको अपर मस्र्याङ्दी र २५ मेगावाटको अपरमादी जलविद्युत् आयोजना निर्माण सम्पन्न गर्ने लक्ष्य राखेको छ ।

http://rajdhani.com.np/article/0831793001457489210