दाता सम्मेलनमा ‘नौ’ डिजाइनका घर प्रदर्शनमा

भीम गौतम / राजधानी
काठमाडौं, ९ असार

बिहीबार सरकारले गर्न लागेको नेपालको पुर्नर्निर्माणका लागि अन्तर्राष्ट्रिय सम्मेलनमा सहरी विकास मन्त्रालयले नौ प्रकारका घरका डिजाइन प्रदर्शन गरिने भएको छ ।

भूकम्पपछिका क्षतिग्रस्त घरको सट्टा नेपालका ग्रामीण क्षेत्रमा निर्माण हुने भूकम्प प्रतिरोधी नौ प्रकारका घर मन्त्रालयले प्रदर्शनमा राख्न लागेको हो ।

मन्त्रालयको भवन विभागले तयार पारेका ती घरहरूको नक्सासहितको फ्लेक्स दाता र विकास साझेदारलाई ध्यानाकर्षण गराउने सम्मेलन केन्द्र सोल्टी होटेलको परिसरमा प्रदर्शन गरिने कार्यक्रम छ ।

‘नौ प्रकारका भूकम्प प्रतिरोधी घर सम्मेलन केन्द्रको वरिपरि प्रदर्शनमा राख्न लागेका छौं,’ भवन विभागमा उपमहानिर्देशक रवि शाहले भने, ‘ग्रामीण क्षेत्रमा उपयोग हुने घरहरू प्रदर्शनमा राखिन लागिएको छ ।’

बढी ग्रामीण र कम सहरी क्षेत्रमा समेत उपयोगी हुने ती डिजाइन विशेष गरी भूकम्पबाट अति प्रभावित १४ जिल्लालाई लक्षित गरी बनाइएको भवन विभागले जनाएको छ ।

प्रदर्शनमा एकतले, तिनतले र दुईतले ६ प्रकारका घरका डिजाइन विभागले तयार पारेको छ । विभागका अनुसार, ढुंगा–माटो, ढुंगा–सिमेन्ट, इँटा–सिमेन्टलगायतका भवनहरू प्रदर्शनमा सहभागी छन् ।

प्रदर्शनका लागि तयार पारिएका भवनको मोडेल, प्रविधि, कामदार, लागतलगायतबारे समेत उल्लेख गरिएको छ । विभागका उपमहानिर्देशक शाहका अनुसार, साढे तिन लाखदेखि २० लाखसम्म पर्ने भवनहरू प्रदर्शनमा राखिनेछन् ।

जाइकाका नमुना घर प्रदर्शन

काठमाडौं÷रास— जापान

अन्तर्राष्ट्रिय सहयोग नियोग (जाइका) ले ललितपुरको पुलचोकस्थित इन्जिनियरिङ अध्ययन संस्थानमा नमुना घर प्रदर्शन गरेको छ ।

ग्रामीण तथा ग्रामीण र सहरी दुवै क्षेत्रमा उपयोगी हुने भूकम्प प्रतिरोधी दुई घरका डिजाइन प्रदर्शन गरेको हो । बुधबार र बिहीबार सर्वसाधारणका लागि समेत ती नमुना घर हेर्न खुला गरिएको छ । बुधबार जाइकाले प्रदर्शनका लागि राखेका नमुना घरहरू सहरी विकासमन्त्री डा. नारायण खड्का तथा जापानका परराष्ट्र राज्यमन्त्री निउरो किउची, नेपालका लागि जापानी राजदूत मासासी आगावा र जाइका अध्यक्ष अकिहिको तानाकाले निरीक्षणसमेत गरेका छन् । ग्रामीण क्षेत्रका लागि उपयोगी हुने नमुना घर दातृ तथा विकास साझेदारको सम्मेलन स्थलबाहिर समेत प्रदर्शनमा राखिन लागेको जाइकाले जनाएको छ ।

http://www.erajdhani.com/article/0871324001435195867