मोदीलाई दाता सम्मेलनमा निम्तो

राजधानी समाचारदाता /काठमाडौं

भारत भ्रमणमा रहेका अर्थमन्त्री डा. रामशरण महतले प्रधानमन्त्री नरेन्द्र मोदीलाई भेटेर १० असारमा हुन लागेको दाता सम्मेलनमा विशेष अतिथिका रूपमा सहभागी हुन निमन्त्रणा गरेका छन् ।

भारतीय प्रधानमन्त्री मोदीको कार्यालयमै भेटेर अर्थमन्त्री डा. महतले प्रधानमन्त्री सुशील कोइरालाको तर्फबाट सो निमन्त्रणा हस्तान्तरण गरेका हुन् । निमन्त्रणा हस्तान्तरण गर्दै महतले मोदीको उपस्थितिले नेपालीलाई हौसला मिल्ने तथा पुनर्निर्माणका लागि स्रोत परिचालनमा पनि सकारात्मक सन्देश जाने बताए । अर्थमन्त्री महतले नेपालमा भूकम्पले पु¥याएको धनजनको क्षति र पुनर्निर्माणका लागि आवश्यक पर्ने रकमबारे प्रधानमन्त्री मोदीलाई जानकारी गराएका थिए । महतले भूकम्पपछि तत्काल छिमेकीका हैसियतले भारतले उद्धार तथा राहतका लागि गरेको सहयोगप्रति आभार व्यक्त गरेका थिए ।

भेटमा भारतीय प्रधानमन्त्री मोदीले सकेसम्म आफैं आउने, आफू आउन नभ्याएमा वरिष्ठ मन्त्री पठाउने जानकारी अर्थमन्त्रीलाई दिएका थिए । अर्थमन्त्रीको भनाइ उद्धृत गर्दै अर्थ मन्त्रालयले जनाएअनुसार मोदीले आफू सहभागी हुन नपाए पनि पुनर्निर्माणका लागि भारतको उत्तिकै सहयोग हुने आश्वासन पनि दिएका छन् ।

अर्थमन्त्री महतले भारत भ्रमणका बेला वित्तमन्त्री अरुण जेटली तथा विदेशमन्त्री सुष्मा स्वराजसँग पनि भेटेका थिए । वित्तमन्त्री जेटलीसँगको भेटमा प्रधानमन्त्री मोदीको नेपाल भ्रमणका अवसरमा भएको सहयोगको घोषणा कार्यान्वयन, नेपालको भारतसँगको व्यापार घाटा न्यूनीकरण, भारतमा नेपाली वस्तुका लागि लाग्दै आएको समीकारक शुल्क, ५ सय र १ हजारका भारु नोटको समस्या तथा नेपालीको भारतीय बैंकहरूमा खाता सञ्चालनजस्ता विषयमा छलफल भएको थियो ।

छलफलका क्रममा वित्तमन्त्री जेटलीले दुई मुलुकबीचका प्राविधिक समितिहरूमा छलफल गराएर यी समस्याको समाधान निकालिने आश्वासन दिएका थिए ।

यसैबीच शुक्रबारै अर्थमन्त्री महतले भारतका उद्यमी व्यवसायीहरूलाई नेपालमा लगानी गर्न आग्रह गरेका छन् । एसोसिएटेड चेम्बर अफ कमर्स एन्ड इन्डस्ट्रिज इन इन्डिया एसोच्यामले नयाँ दिल्लीमा आयोजना गरेको अन्तक्र्रियामा उनले नेपालमा लगानी गर्न आग्रह गरेका हुन् ।

http://www.erajdhani.com/article/0808673001434158703