चमेलिया जलविद्युत् ठेकेदार कम्पनीको धरौटी जफत

भीम गौतम\राजधानी
काठमाडौं, १६ भदौ
निर्माणाधीन ३० मेगावाट क्षमताको चमेलिया जलविद्युत् आयोजनाको कोरियन ठेकेदार कम्पनी केएचएनपी कन्सोटियमले राखेको धरौटी नेपाल विद्युत् प्राधिकरणले जफत गरेको छ ।
इलेक्ट्रोमेकानिकल, हाइड्रो मेकानिकल र १३२ केभी प्रसारण लाइन निर्माणको ठेक्का लिएको सो कम्पनीको रकम प्राधिकरणले जफत गरेको हो । शुक्रबार प्राधिकरणले सो ठेकेदार कम्पनीले एडभान्स पेमेन्टबापत बैंक अफ काठमाण्डूमा राखेको १२ करोड २८ लाख ८१ हजार बराबरको रकम जफत गरेको हो । प्राधिकरणद्वारा परफर्मेन्सबापत राखिएको ३ करोड २६ लाख ३२ हजार बराबरको रकमको जफत गर्ने प्रक्रियासमेत प्राधिकरणले अघि बढाएको छ । प्राधिकरणका निमित्त कार्यकारी निर्देशक लवबहादुर घिमिरेले सर्वोच्च अदालतको आदेशपछि रकम जफत गरिएको जानकारी दिए ।
१५ दिनअघि कोरियन कम्पनी कन्सोटियमले प्राधिकरणलाई पत्र पठाउँदै आयोजनाको बढेको समयबापतको १ अर्ब ४० करोड भुक्तानी नदिएको भन्दै एकतर्फी रूपमा सम्झौता तोडेको थियो । सम्झौता तोडेसँगै करार ऐन २०५६ को दफा ८७ अनुसार धरौटीमा राखिएको रकम जफत नगराउन आदेश माग्दै १५ दिनअघि नै सर्वोच्च अदालतमा मुद्दा दायर गरेको थियो । अदालतले शुक्रबार प्राधिकरणको पक्षमा आदेश दिएलगत्तै प्राधिकरणले एडभान्स पेमेन्टबापतको सो रकम जफत गरेको हो । जफत रकमबारे प्राधिकरणको आइतबार बसेको ६६२औं बैठकमा जानकारीसमेत दिइएको थियो ।
सन् २००९ को अप्रिलदेखि सन् २०११ को डिसेम्बरभित्र काम सम्पन्न गर्नेगरी सम्झौता गरेको सो कम्पनीको म्याद सन् २०१३ को डिसेम्बर ३० सम्म थपिएको थियो । विभिन्न कारणले सिभिलको ठेक्का लिएको चाइना गेजुवा गु्रप लिमिटेड (सीजीजीसी) ले समयमै आयोजनाको काम पूरा गर्न नसकेपछि थपिएको समयको समेत कोरियन कम्पनीले प्राधिकरणसँग रकम मागेको थियो । सम्झौतामा थपिएको समयको रकम दिन नमिल्ने उल्लेख भएको भन्दै प्राधिकरणले दिन नमानेपछि कोरियन कम्पनीले ३० साउनमा एकतर्फी रूपमा ठेक्का तोडेको थियो । कोरियाली सरकारको सहयोगमा निर्माण गरिरहेको आयोजनाको लागत १३ अर्ब नाघिसकेको छ भने सुरुङको ५५० मिटर क्षेत्र सा“घुरिदै गएपछि निर्माणमा थप समस्या बढेको छ । सन् २०१३ को अगस्टभित्र निर्माण सम्पन्न गर्ने आयोजनाको लक्ष्य रहे पनि पूरा हुन सकेन । आयोजना निर्माण पूरा हुन् अब थप एक वर्ष लाग्ने अनुमान गरिएको छ ।